तुमचा पार्टनर खरंच तुमच्या प्रेमात आहे की चाललाय फक्त Timepass? असं ओळखा लगेच!

बराच काळ एकत्र राहूनही तुम्हाला तुमचं नातं मैत्रीपलीकडचं वाटत नसेल, तर पुढे धोका आहे. कोणत्याही गोड नात्याची सुरुवात मैत्रीने होते हे खरंय, पण जोडीदार म्हणून आयुष्य सोबत घालवायचं असेल तर फक्त शरिराने नाही, दोघांनी मनानेही एक व्हायला हवंय.

तुमच्यात आणि जोडीदारात भविष्याबाबत चर्चा होतच असेल. त्याच्या किंवा तिच्या बोलण्यात भविष्यातल्या घटनांमध्ये तुमचा उल्लेख येत नसेल तर पुढे धोका आहे. शिवाय बोलण्यात त्याच्या किंवा तिच्या कुटुंबियांचा उल्लेख येतोय, मित्र-मैत्रिणींचा उल्लेख येतोय पण तुमचाच उल्लेख नसेल तर हे रिलेशन पुढे नेण्यात अर्थ नाही. कारण तो तुम्हाला त्याच्या भविष्यात पाहत नाही किंवा तुम्ही भविष्यात त्याच्यासोबत नसलात तरी त्याला काही फरक पडत नाही. शिवाय जर त्याच्या बोलण्यात तुमचा किंवा कोणाचाच उल्लेख नसेल, तो वारंवार फक्त त्याच्या एकट्याच्या भविष्याबाबत बोलत असेल तर तो स्वार्थी आहे हे समजून जा.

दोघांनाही एकमेकांसोबत राहायचंय तर दोघांनीही ते नातं सुदृढ ठेवण्यासाठी प्रयत्न करणं आवश्यक आहे. परंतु जोडीदाराशी बोलायला तुम्हालाच सारखा सारखा पुढाकार घ्यावा लागत असेल, त्याला तुमच्याशी बोलण्यात काही रस नाहीये किंवा या नात्यात फक्त तुमच्या एकट्याचंच अस्तित्त्व आहे असं तुम्हाला वाटत असेल तरीही पुढे धोका आहे. लक्षात घ्या, प्रेम, काळजी, विश्वास आणि ओढ दोघांकडूनही असावी लागते, एकाकडूनच असेल तर ते नातं पुढे टिकत नाही.

तुम्ही कोणाचातरी जोडीदार असण्यापूर्वी किंवा तुमचा कोणीतरी जोडीदार असण्यापूर्वी तुम्ही स्वतः स्वतःचे जोडीदार आहात. त्यामुळे स्वतःला जपा. तुमचा आनंद कशात आहे, हे व्यवस्थित कळलं तरच तुम्ही तुम्हाला आनंदी ठेवणारी ती खास व्यक्ती शोधू शकाल आणि तीसुद्धा सुखात राहावी यासाठी आपसूकपणे प्रयत्न कराल. हीच बाब दोन्ही जोडीदारांना कळली म्हणजेच तुम्ही आयुष्याचे जोडीदार झालात, हे कायम लक्षात ठेवा.