दिवाळीत मोर आणि बदकांना मागणी, सोलापुरातील बाजारात मोठी गर्दी, Video

सोलापूर - दिवाळीचा सण अवघ्या पाच-सहा दिवसांवर येऊन ठेपला आहे. या सणाच्या पार्श्वभूमीवर सोलापूर शहारातील प्रमुख चौकात दिवाळीच्या खरेदीसाठी नागरिकांची गर्दी होतेय. त्यामुळे बाजारात चैतन्याचे वातावरण निर्माण झाले आहे. अनेकजण दिवाळीसाठी आकाश कंदील, पणती खरेदी करताना दिसत आहेत. यंदा बाजारात कोणत्या प्रकारच्या पणत्या आहेत? आणि त्यांचे दर काय आहेत? याबाबत पणती बनवून विकणाऱ्या मीराबाई कुंभार यांनी लोकल18 सोबत बोलताना माहिती दिलीये.

मीराबाई कुंभार या सोलापूर शहारातील डफरीन चौक येथे पणत्या विक्री करतात. दिवाळी सण दिव्यांचा सण म्हणून ओळखला जातो. सर्वाधिक दिवे लावून परिसर प्रकाशमय केला जातो. यासाठी पणत्या वापरल्या जातात. परंतु, पारंपरिक पद्धतीने वापरात असलेल्या मातीच्या पणत्यांची, आकर्षक दिसणाऱ्या प्लॅस्टिक, इलेक्ट्रिक पणत्यांनी जागा घेतली आहे. परिणामी मातीच्या पणत्या विक्रीवर परिणाम झालेला दिसून येतो.

दरम्यान, घराची शोभा वाढवणारे विविध आकर्षक स्टिकरही बाजारात आले आहेत. यात शुभ लाभ, स्वस्तिक, पावले, श्री आणि इतर सजावट साहित्यांचा समावेश आहे.