आता फटाके फोडायचे नाहीत, तर खायचे! पाहा दिवाळीला बाजारात काय आलंय?

पुणे : दिवाळी म्हणजे प्रकाशमय करणारा सण. अगदी लहानांपासून ते मोठ्यांपर्यंत प्रत्येक जण या सणाची वाट पाहत असतो. हा सण आनंद, प्रकाश आणि समृद्धी घेऊन येणारा मानला जातो. दिवाळीला आकर्षक रोषणाईसोबतच खमंग खुशखुशीत फराळालाही महत्त्व असतं. अनेकजण दिवाळीत फटाकेही फोडतात. पण पर्यावरणाला हानीकारक फटाके फोडू नये, असं आवाहन पर्यावरणप्रेमींकडून केलं जातं. आता फटाकेप्रमी फटाके फोडण्याऐवजी खाऊही शकणार आहेत. पुण्यातील मूर्तीज बेकरी यांनी बच्चे कंपनीसाठी चॉकलेटचे फटाके अन् फराळ तयार केलाय.

पुण्यातील सोमवार पेठ इथे असलेली मूर्तीज बेकरी ही 88 वर्ष जुनी आहे. अनेक वर्ष झालं ते चॉकलेटचे फटाके तयार करतात. मागील 10 ते 15 वर्षांपासून ते चॉकलेटचे फटाके बनवत आहेत. आता मागच्या दोन तीन वर्षांमध्ये मागणी वाढली आहे. बाजारात ज्या आकाराचे फटाके मिळतात त्याच आकाराचे चॉकलेट फटाके इथे बनवले जातात. त्यामध्ये सुतळी बॉम्ब, पाऊस, लड, आकाश कंदील,चक्र, फुलबाज्या, रॉकेट, फ्लॉवर पॉट असे फटाके या ठिकाणी मिळतात.