Egg Rate: मुंबई पुण्यातील अंड्याचे भाव 5 वर्षातील उच्चांकावर, आता किती मोजावे लागणार?

राज्यातील मोठ्या शहरांमध्ये अंड्यांचे दर विक्रमी पातळीवर पोहोचले आहेत. जून अखेर असूनही दर कमी होण्याऐवजी सातत्याने वाढतच आहेत. सध्या मुंबईतील अनेक भागांमध्ये एका डझन अंड्यांचा किरकोळ दर 78 ते 90 रुपयांपर्यंत गेला असून, पुण्यात देखील 84 रुपयांपर्यंत विक्री होत आहे. मार्च 2025 मध्ये मुंबईतील अंड्यांचा घाऊक दर प्रति 100 अंडी 470 रुपये होता. जूनमध्ये तो 600 रुपयांपर्यंत पोहोचला आहे. नॅशनल एग कॉर्डिनेशन कमिटी (NECC) च्या माहितीनुसार, जून महिन्यात दर 570 ते 610 रुपयांच्या दरम्यान राहिला आहे. ही दरवाढ गेल्या पाच वर्षांतील सर्वाधिक आहे.

मुंबईतील लोखंडवाला कॉम्प्लेक्स, अंधेरी येथे अंडी 90 रुपये डझन विकली गेली. बोरिवली व बांद्रा येथे 80 रुपये, तर वसईतील दर 78 रुपयांवर आहे. चेंबूर व कांजुरमार्ग येथे ऑनलाईन खरेदी करणाऱ्यांना एका डझन अंड्यांसाठी 117 रुपये मोजावे लागले. विशेष प्रकारच्या सहा अंड्यांचे बॉक्स 57 रुपयांना विकले जात आहेत.

महाराष्ट्र अंडी व्यापारी संघटनेचे सदस्य वसीम शेख यांनी सांगितले की, “उन्हाळ्यात कोंबड्या उष्माघातामुळे मरतात, त्यामुळे उत्पादन घटते. पावसामुळे वाहतूक व पुरवठा साखळी अडथळलेली आहे. यामुळे सध्या अंड्यांचा पुरवठा मर्यादित आहे आणि मागणी वाढलेली आहे.”

पुण्यातही अंड्यांचे दर झपाट्याने वाढले असून, मे महिन्याच्या सुरुवातीस 66 रुपये डझन असणारी अंडी सध्या 84 रुपयांपर्यंत पोहोचली आहेत. घाऊक दरही 485 वरून 601 रुपयांपर्यंत गेले आहेत. दरवाढ अजून काही काळ कायम राहण्याची शक्यता आहे. मात्र, पुढील 15-20 दिवसांत हवामान सुधारल्यास आणि उत्पादन पुन्हा सुरू झाल्यास दर काहीसे स्थिर होऊ शकतात, असे व्यापाऱ्यांचे म्हणणे आहे.