Thalipeeth Pizza : कधी थालीपीठ पिझ्झा खाल्ला का? खवय्यांची असते गर्दी, ट्राय तर करा

कर्वेनगर भागात स्वामी समर्थ स्नॅक्स या नावाने गेली दोन वर्षे कैलास काळे आणि प्रांजल काळे हे दाम्पत्य खाद्यव्यवसाय करत आहे. सुरुवातीला एका छोट्या फूड कार्टपासून सुरू झालेला हा प्रवास आज दोन दुकानांपर्यंत पोहोचला आहे. विशेष म्हणजे बेकरीचा व्यवसाय बंद करून अवघ्या 50 हजार रुपयांचे कर्ज घेऊन त्यांनी या नव्या व्यवसायाची सुरुवात केली होती.

सुरुवातीला चीज थालीपीठ तयार करण्यात आले. पारंपरिक थालीपीठ आणि चीज यांचा मिलाफ ग्राहकांना आवडू लागला. मिळालेल्या सकारात्मक प्रतिसादानंतर त्यांनी आणखी एक पाऊल पुढे टाकत पिझ्झा थालीपीठ ही संकल्पना सुरू केली. थालीपीठाच्या बेसवर भाज्या, सॉस आणि चीजचा वापर करून तयार होणारा हा पदार्थ विद्यार्थ्यांमध्ये विशेष लोकप्रिय ठरत आहे. यासोबतच पारंपरिक, ऑथेंटिक थालीपीठही येथे उपलब्ध आहे.

थालीपीठची किंमत अवघ्या 40 रुपयांपासून सुरू होते, त्यामुळे हा पदार्थ सर्वसामान्यांना परवडणारा आहे. गावाकडे आमचा केकचा व्यवसाय होता, पण पुण्यात काहीतरी वेगळं करण्याची मनापासून इच्छा होती. टेबलपासून सुरू झालेला हा व्यवसाय आज दोन शॉपपर्यंत पोहोचला आहे, ही गोष्ट आमच्यासाठी अभिमानाची आहे असेही प्रांजल काळे यांनी सांगितले.

आज स्वामी समर्थ स्नॅक्सचा थालीपीठ पिझ्झा केवळ कर्वेनगरपुरता मर्यादित न राहता पुण्याच्या इतर भागांतूनही ग्राहकांना आकर्षित करत आहे. कमी भांडवल, नवी कल्पना आणि मेहनतीच्या जोरावर उभा राहिलेला हा व्यवसाय अनेक नवउद्योजकांसाठी प्रेरणादायी ठरत आहे.