अ‍ॅसिडिटी अन् चेहऱ्यावरील पिंपल्स होतील दूर, पाहा जांभूळ खाण्याचे शरीरासाठी फायदे

जांभूळ हे अतिशय बहुगुणी फळ आहे. क जीवनसत्वाने भरपूर असल्याने थकवा येत असेल, हिरड्यांवर सूज येत असेल यासाठी जांभूळ अतिशय उपयुक्त आहे. डायबिटीस रुग्णांसाठी तर जांभूळ हे एक प्रकारे वरदानच आहे. यामुळे मधुमेह असणाऱ्या रुग्णांनी जांभळाचे नियमित सेवन करावे. याचबरोबर जांभळाच्या बियांची पेस्ट, जांभळाची साल, जांभळाच्या झाडाची पाने ही देखील अतिशय उपयुक्त असतात, असं आहार तज्ज्ञ गीता कोल्हे सांगतात.

जांभूळ बियांची पेस्ट करून मधुमेही रुग्णांनी दररोज त्याचा आहारात समावेश केल्यास खूप फायदे मिळतात. तसेच मुतखड्याचा त्रास असलेल्या रुग्णांनी देखील जांभूळ बियांच्या पेस्टचा आपल्या आहारात समावेश करावा. जांभूळमध्ये एंटीऑक्सीडेंट असल्याने रोगप्रतिकारक शक्ती वाढते. याचबरोबर आपली पचनक्रिया सुधारते. जांभूळ गुणांनी थंड असल्याने शरीरातील दाह कमी करतं. यामुळे ज्यांना अ‍ॅसिडिटी अपचन बद्धकोष्ठता असे त्रास आहे त्यांनी आवर्जून जांभूळ फळाचे सेवन करावं. जांभूळ त्वचेसाठी देखील अतिशय उपयुक्त असून जांभळाच्या सेवनाने आणि त्या डिटॉक्स होऊन त्वचेवर ग्लो येतो. चेहऱ्यावर पिंपल्स असतील तर ते नाहीसे होण्यास देखील जांभळाचा उपयोग होतो, असं आहार तज्ज्ञ गीता कोल्हे सांगतात.

जांभूळ आरोग्यासाठी अतिशय उपयुक्त असले तरी त्याचे सेवन हे एका विशिष्ट मर्यादितच केले पाहिजे. दहा ते बारा जांभळांच सेवन दररोज करण्यास हरकत नाही. तर मधुमेह असलेल्या व्यक्तींनी 15 ते 20 जांभूळ फळांची सेवन करावे तर वृद्ध किंवा लहान मुलांनी पाच ते सहाच जांभूळ फळे खावीत.

जांभूळ गुणांनी थंड असल्याने जास्त प्रमाणात सेवन केल्यास उलट्यांचा त्रास होऊ शकतो. याचबरोबर जुलाब, शरीरावर गाठी येणे, यासारखी दुष्परिणाम देखील उद्भवू शकतात. अशाप्रकारे जांभूळ हे फळ गुणांनी अतिशय उपयुक्त असून त्याचे दररोज नियमित सेवन केल्यास आपल्या आरोग्यास भरपूर फायदे मिळतात. त्यामुळे या बहुगुणी फळाचे सेवन प्रत्येकाने करावं, असं आवाहन गीता कोल्हे यांनी केले आहे.