Clinical Depression : उदासीनता अन् नकारात्मक विचार, आरोग्यावरही खोलवर होतो परिणाम, या आजाराला दुर्लक्ष करू नका!

आपले पर्यावरण आणि सामाजिक परिस्थितीही नैराश्याला कारणीभूत ठरू शकतात. बालपणीतील हिंसाचार, गैरवर्तन किंवा दुर्लक्ष यासारख्या अनुभवांचा दीर्घकालीन परिणाम व्यक्तीच्या मानसिक आरोग्यावर होतो. गरिबी, सामाजिक वंचितता आणि आर्थिक अस्थिरता यामुळेही क्लिनिकल डिप्रेशनचा धोका वाढतो. याशिवाय, जीवनातील अचानक बदल, जसे की प्रिय व्यक्तीचा मृत्यू, नोकरी गमावणे, घटस्फोट किंवा गंभीर आजार, हे देखील नैराश्याला कारणीभूत ठरू शकतात. व्यसनाधीनता, तीव्र तणाव, मेंदूच्या गाठीसारख्या वैद्यकीय समस्या किंवा अत्यंत निराशावादी दृष्टिकोन यामुळेही ही समस्या उद्भवू शकते.

कुटुंब आणि मित्रांचा पाठिंबा हा उपचार प्रक्रियेत महत्त्वाचा आहे. नैराश्यग्रस्त व्यक्तीला प्रेम, समजूतदारपणा आणि प्रोत्साहन देणे आवश्यक आहे. समाजात मानसिक आरोग्याबाबत जागरूकता वाढवणे आणि त्याबाबत खुलेपणाने बोलणे गरजेचे आहे. शाळा, महाविद्यालये आणि कामाच्या ठिकाणी मानसिक आरोग्याबाबत कार्यशाळा आणि समुपदेशन कार्यक्रम आयोजित केले जावेत.

क्लिनिकल डिप्रेशन ही एक लढाई आहे, जी योग्य उपचार, पाठिंबा आणि इच्छाशक्तीने जिंकता येते. समाजाने या समस्येला गंभीरपणे घेऊन, प्रत्येक व्यक्तीला निरोगी आणि आनंदी जीवन जगण्याची संधी दिली पाहिजे. मानसिक आरोग्य हा आपल्या एकूण आरोग्याचा अविभाज्य भाग आहे, आणि त्याकडे दुर्लक्ष करणे परवडणारे नाही, असं डॉ. उत्तम गव्हाणे सांगतात.