लग्नानंतर पहिल्यांदाच जेवण, सासूने भाकरी सांगितली, पण येत नाही? हा VIDEO पाहा पहिल्याच प्रयत्नात परफेक्ट होईल

पीठ मळण्यासाठी जे ताट घेणार आहे, त्याखाली ओला कपडा ठेवा जेणेकरून ताट हलणार नाही. आता पीठात थोडंथोडं पाणी टाकून मळून घ्या. एक वाटी पीठ आणि पाऊण वाटी पीठ असं प्रमाण परफेक्ट आहे. पीठ नीट मळा, नाहीतर भाकरीला भेगा पडू शकतात किंवा भाकरी नीट थापली जात नाही. पीठ बारीक दळून आणायचं.

सुरुवातीला भाकरी लहानच करा म्हणजे ती उचलून तव्यावर टाकणंही सोपं होईल. पिठाचा गोळा हातात घेऊन थोडा चपटा करून घ्या. ताट ओलं नसावं म्हणजे पीठ चिकटणार नाही. ताटात थोडं कोरडं पीठ पसरवून घ्या आणि कमी दाब देऊन हाताच्या तळव्याने नीट थापून घ्या. जास्त दाब देऊ नका नाहीतर पीठ ताटाला चिकटेल. ताटात पीठ मळून तुम्ही भाकरी पोळपाटावरही थापू शकता.

गॅस मोठा ठेवा, तवा नीट गरम करून घ्या. तवा नीट गरम झाला नाही तर भाकरीचे पापुद्रे निघतात, ती नीट फुगत नाही, कडक होते. पाण्याचा शिबका मारून तवा गरम झाला का पाहा. भाकरी थापली तो भाग तव्यावर आणि पिठाचा भाग अशी भाकरी तव्यावर टाका. पाणी एकदम जास्त आणि एकदम कमीही नाही, भाकरी टाकल्यानंतर काही सेकंदात थोडं थोडं पाणी लावा.भाकरी टाकल्या टाकल्या लावू नका, भाकरीला चिरा पडतील. पाणी लावताना भाकरी पोळू देऊ नका, नाहीतर भाकरीचं पाणी लगेच सुकते.

भाकरी नरम राहण्यासाठी थंड झाल्यावर टोपलीत सुती कापड टाकून त्यात गुंडाळून ठेवा किंवा चपातीच्या भांड्यात बंद करून ठेवा. @Ruchkarswad या युट्युब चॅनेलवर हा व्हिडीओ पोस्ट करण्यात आला आहे.