Joints Pain : तिशीच्या आधी गुडघे दुखतायत ? कारणं, सांधेदुखीच्या प्रतिबंधात्मक उपायांविषयी जाणून घ्या

अनेक तरुणांना सकाळी उठल्याबरोबर जडपणा जाणवतो, थोडा वेळ बसल्यानंतर उभं राहण्यास त्रास होतो किंवा हलका व्यायाम केल्यानंतरही सांधे दुखतात. हा बदल अचानक झालेला नाही. आपली बदलती जीवनशैली हे याचं एक प्रमुख कारण आहे.

तरुणांमधे सांधेदुखीची मुख्य कारणं:

दीर्घकाळ बसणं - आजच्या कामाच्या जीवनशैलीमुळे मोबाईल फोन आणि लॅपटॉपचा वापर लक्षणीयरीत्या वाढला आहे. जास्त वेळ एकाच ठिकाणी बसून राहणं आणि हालचाली मर्यादित केल्यानं स्नायू कमकुवत होतात. स्नायू कमकुवत होतात तेव्हा सांध्यावर जास्त दबाव येतो.

चुकीची शारीरिक स्थिती - वाकून बसणं, मान खाली ठेवून मोबाईलकडे पाहणं किंवा बराच वेळ त्याच स्थितीत राहणं हे मान, खांदे आणि पाठीसाठी हानिकारक आहे.

चुकीचा किंवा जास्त व्यायाम - व्यायाम महत्त्वाचा आहे, पण तो चुकीच्या पद्धतीनं केल्यानं दुखापत होऊ शकते. वॉर्म अप न करता जड वजन उचलणं किंवा प्रशिक्षकाशिवाय जड व्यायाम करण्यामुळे सांध्यांना नुकसान होऊ शकतं.

कमकुवत कोअर स्नायू - पोटाचे आणि पाठीचे स्नायू शरीराला आधार देतात. हे स्नायू कमकुवत असतील तर ते गुडघे आणि कंबरेवर जास्त दबाव आणतात.

सकाळी उठताना जडपणा जाणवत असेल, पायऱ्या चढताना किंवा उतरताना गुडघ्यांमधे वेदना होत असतील, खांदा वळवताना आवाज येत असेल, किंवा बराच वेळ बसल्यानंतर पाठदुखी होत असेल किंवा हलक्या व्यायामानंतरही सूज आणि वेदना होत असतील तर नक्कीच डॉक्टरांचा सल्ला घ्या.

सांधेदुखीचा त्रास रोखण्यासाठी, दररोज किमान तीस मिनिटं चालणं किंवा हलका व्यायाम करणं उपयुक्त आहे. तसंच तुम्ही जर व्यायाम करत असाल तर ते करण्यापूर्वी आणि नंतर स्ट्रेचिंग करा. कोर स्नायूंना बळकटी देणारे व्यायाम करा. सरळ बसा, काम करताना, स्क्रीन डोळ्यांच्या पातळीवर ठेवा आणि दर तीस-चाळीस मिनिटांनी लहान ब्रेक घ्या. वजन निरोगी राहिल यासाठी प्रयत्न करा, कारण जास्त वजनामुळे गुडघ्यांवर दबाव येतो.