Special Halwa Recipe : गाजर हलव्यालाही टक्कर! 'या' स्पेशल हलव्याने जिंकली लोकांची मनं, झटपट पाहा रेसिपी

Published by:Devika Shinde

Last Updated:Jan 30, 2026 3:52 PM IST

विचार करा, ज्या दुधी भोपळ्याची भाजी पाहताच अनेकजण नाकं मुरडतात, त्याच दुधीपासून बनलेला हलवा जर एखाद्या शहराची ओळख बनला असेल तर?

मुंबई : थंडीच्या दिवसात गरमागरम गाजराचा हलवा समोर आला की कोणाच्याही तोंडाला पाणी सुटतं. डाळीचा हलवा, रव्याचा शिरा किंवा मुगाच्या डाळीचा हलवा आपण आजवर अनेकदा चाखला असेल. सण-समारंभ असो वा पाहुणचार, गोड पदार्थ म्हटलं की आपल्या डोळ्यांसमोर ठराविक नावं येतात. पण विचार करा, ज्या दुधी भोपळ्याची भाजी पाहताच अनेकजण नाकं मुरडतात, त्याच दुधीपासून बनलेला हलवा जर एखाद्या शहराची ओळख बनला असेल तर?

हो, उत्तर प्रदेशातील बलिया जिल्ह्यात सध्या एका खास हलव्याची प्रचंड चर्चा सुरू आहे. भाजी म्हणून ओळखला जाणारा आरोग्यदायी दुधी भोपळा जेव्हा मिठाईचं रूप घेतो, तेव्हा त्याचा स्वाद किती शाही असू शकतो, याचं उत्तम उदाहरण म्हणजे बलियाचा हा प्रसिद्ध 'लौकीचा हलवा'.

बलियाच्या सिकंदरपूरमधील 'राज स्वीट्स' सध्या खवय्यांच्या पसंतीस उतरत आहे. निमित्त आहे त्यांनी तयार केलेला खास दुधीचा (लौकी) हलवा. हा हलवा केवळ चवीलाच लाजवाब नाही, तर तो आरोग्यासाठीही तितकाच फायदेशीर मानला जातोय.

शुद्धता आणि चवीचा अनोखा संगम

दुकानदार संजय कुमार मदनवाल यांच्या मते, त्यांच्या दुकानात चवीसोबतच आरोग्याचीही पूर्ण काळजी घेतली जाते. या हलव्याचं सर्वात मोठं वैशिष्ट्य म्हणजे यात कोणत्याही प्रकारचा कृत्रिम रंग (Artificial Color) किंवा केमिकल वापरलं जात नाही. याचा हिरवा रंग पूर्णपणे नैसर्गिक असून शुद्धतेची 100 टक्के खात्री दिली जाते.

कसा तयार होतो हा 'मॅजिकल' हलवा?

या हलव्याची रेसिपी जितकी पारंपरिक आहे तितकीच ती गोपनीयही ठेवली जाते. तरीही त्याचे काही टप्पे खवय्यांची उत्सुकता वाढवतात:

निवडक साहित्य: हलव्यासाठी बाजारातून खास लहान, कोवळ्या आणि ताजी दुधी निवडली जाते.

दुधाचा अभिषेक: किसलेला दुधी शुद्ध दुधामध्ये मंद आचेवर तासनतास शिजवली जाते, जोपर्यंत दूध आणि दुधी एकजीव होत नाहीत.

ड्राय फ्रूट्स आणि शुद्ध तूप: शिजत असतानाच यामध्ये सुका मेव्याचं खास मिश्रण टाकलं जातं. शेवटी वरून भरपूर साय (मलाई) आणि शुद्ध देशी तुपाची धार सोडली जाते. या तुपाचा सुवास आसपासचा परिसर दरवळून सोडतो.

खास कारागिरांची जादू

हा हलवा बनवण्यासाठी राज स्वीट्सने वाराणसी आणि लखनौहून खास कारागीर बोलावले आहेत. पारंपरिक पद्धतीचा वापर करून हा हलवा तयार केला जातो, म्हणूनच त्याची चव इतर मिठाईंपेक्षा वेगळी लागते. जे लोक जास्त गोड किंवा जड पदार्थ खाणे टाळतात, त्यांच्यासाठी हा हलका आणि पौष्टिक हलवा उत्तम पर्याय ठरत आहे.

किंमत आणि कुठे मिळेल?

हा शाही हलवा सध्या ₹600 प्रति किलो दराने विकला जात आहे. ग्राहकांची वाढती गर्दी आणि मागणी पाहता, सिकंदरपूरच्या राज स्वीट्सने आता आपली नवी शाखा बलियाच्या आर्य समाज रोडवरील मनजीत सिंह कंपनीच्या समोर सुरू केली आहे.

भाजीच्या स्वरूपात न आवडणारी दुधी आता मिठाईच्या रूपात लोकांच्या मनावर राज्य करत आहे. जर तुम्ही बलियाच्या आसपास असाल किंवा तिथे जाणार असाल, तर या 'लौकीच्या हलव्याचा' आस्वाद घ्यायला विसरू नका.

view comments

Location :

Mumbai,Maharashtra

First Published :

Jan 30, 2026 3:52 PM IST

///

Special Halwa Recipe : गाजर हलव्यालाही टक्कर! 'या' स्पेशल हलव्याने जिंकली लोकांची मनं, झटपट पाहा रेसिपी