उपवासाचा पिझ्झा तुम्ही कधी खाल्लाय का? बनवण्याची ही सोपी पद्धत पाहा Video

उभे चिरलेले बटाट्याचे काप, लाल तिखट, तूप, काळे द्राक्ष, इनो, भगर आणि साबुदाण्याचे पीठ, चीज, बटाट्याचा खीस, चिली फ्लेक्स, पनीर, हिरवी मिरची ( तिखट नसलेली मिरची ), सैंधव मीठ हे साहित्य लागेल.

सर्वप्रथम तव्यावरती बटाट्याचे काप टाकायचे. 10 ते 12 मिनिटांत चांगले फ्राय करून घ्यायचे. त्यानंतर आपल्या गरजेनुसार पीठ घ्यायचं. पाणी आणि थोडसं मीठ टाकून फेटून घ्यायचं. जास्त पातळ पण नाही आणि जास्त घट्ट पण नाही. ते पीठ त्या बटाट्याच्या कपावर टाकायचं आणि 10 मिनिटे तसेच ठेवून द्यायचं. सॉस तयार करण्यासाठी पॅनमध्ये थोडं तूप टाकायचं. त्यानंतर त्यामध्ये तिखट टाकायचं आणि बटाट्याचा खिस आणि चीज हे पाणी टाकून पातळ करून घ्यायचं. ते त्या कढईत टाकायचं आणि त्याला चांगलं शिजू द्यायचं. त्यामधे थोडंसं मीठ देखील टाकायचं. हिरवी मिरची आणि पनीर हे थोडसं फ्राय करून घ्यायचं.

नंतर बटाट्याचे काप आणि पीठ टाकलेला बेस आहे तो उलटा करून घ्यायचा म्हणजे पलटून घ्यायचा. त्यानंतर त्यावरती आपण जो सॉस केलेला आहे तो टाकायचा आहे आणि वरतीनंतर टॉपिंगसाठी पनीर आणि हिरवी मिरची टाकायची. आणि काळ्या द्राक्षाची काप टाकायचे आणि त्यावरती चीज टाकायचं. चीज मेल्ट झालं की एका डिशमध्ये तो पिझ्झा काढून घ्यायचा. आणि अशा पद्धतीने हा पिझ्झा तयार होतो. चीज हे दुधापासून तयार होतं त्यामुळे ते उपवासासाठी चालतं, असं गृहिणी प्रज्ञा तल्हार सांगतात.