चिखलदऱ्याच्या रबडीची चवच न्यारी, चुलीवरच्या चवीला ग्राहकांची मोठी पसंती, बनते कशी? Video

अमरावती : अमरावतीमधील मेळघाटला वर्षभरात अनेक लोकं भेटी देतात. तेथील निसर्ग सौंदर्य हे भारावून टाकणारे आहे. त्यामुळे तेथील अनेक गावातील नागरिकांनी व्यवसाय सुरू केले आहे. काहींनी सीताफळ रबडी, खवा, तूप आणि बरेच असे व्यवसाय चिखलदरा रोडला बघायला मिळतात. त्यातीलच एक म्हणजे मेळघाटमधील मडकी येथील चिखलदऱ्याची सुप्रसिद्ध रबडी. मेळघाटमध्ये गवळी बांधव जास्त असल्याने तेथील अनेक लोकांनी दुग्ध व्यवसाय सुरू केला आहे. मडकी येथील गजानन चव्हाण यांनी 2018 मध्ये रबडी बनवायला सुरुवात केली. ते चुलीवरची रबडी बनवत असल्याने त्याची चव ही जिभेवर रेंगाळत राहते. त्यामुळे आता चिखलदऱ्याची रबडी सर्वत्र प्रसिद्ध झाली आहे.

यशवंत रबडी सेंटरचे मालक गजानन चव्हाण यांच्याशी लोकल 18 ने संवाद साधला. तेव्हा ते सांगतात की, सर्वात आधी माझे वडील दूध, तूप, खवा हे बाहेरगावी विकायला घेऊन जात होते. त्यातून काही जास्त नफा मिळत नव्हता. त्यामुळे आम्ही विचार केला की, एखादा व्यवसाय आपल्याकडेच सुरू करावा. तेव्हा चिखलदऱ्याला पर्यटक देखील जास्त वाढले होते. तेव्हा आम्ही 2018 मध्ये यशवंत रबडी सेंटर सुरू केले. आम्ही बनवत असलेली रबडी आता चिखलदऱ्याची सुप्रसिद्ध रबडी म्हणून सगळीकडे ओळखली जाते. याचे कारण हेच की, गॅस आणि इलेक्ट्रिक वस्तूच्या काळात आम्ही चुलीवर रबडी बनवतो. त्यामुळेच ही रबडी सगळ्यांच्या जिभेवर रेंगाळत राहते.