Maratha Tourism: शिवनेरी ते रायगड, किल्ल्यांना जोडणार मराठा पर्यटन ट्रेन, कधीपासून होणार सुरू?

छत्रपती शिवाजी महाराज सर्किट रेल्वेतून प्रवाशांना शिवजन्मस्थळ आणि शिवरायांचे किल्ले आणि विजयी मोहिमांशी संबंधित ठिकाणी प्रत्यक्ष जाण्याची संधी मिळणार आहे. या अनोख्या प्रवासासाठी पर्यटकांना विशेष यात्रा पॅकेज मिळणार आहे. 'आईआरसीटीसी द्वारा संचालित भारत गौरव टुरिस्ट ट्रेन आहे. विशेष मराठा पर्यटन उपक्रमांतर्गत छत्रपती शिवाजी महाराज सर्किटसह मराठा साम्राज्याच्या गौरवशाली इतिहास पाहण्यासाठी संधी देशभरातील प्रवाशांना मिळणार आहे.

मराठा पर्यटन ट्रेनचा प्रवास सहा दिवसांचा असणार आहे. या प्रवासात विशेष पर्यटन मार्गात रायगड, शिवनेरी, प्रतापगड आणि पन्हाळगडाचा समावेश आहे. छत्रपती शिवाजी महाराज टर्मिनस तसेच दादर आणि ठाणे स्थानकावरून ही रेल्वे 9 जूनला सुटेल. पॅकेजमध्ये स्लीपर, एसी तृतीय श्रेणी, एसी द्वितीय श्रेणीतून प्रवासाची सोय आणि हॉटेलमध्ये मुक्कामाची सुविधा आहे.

मराठा पर्यटन ट्रेनच्या माध्यमातून शिवजन्मस्थळ शिवनेरी, पुणे परिसरातील लाल महाल, कसबा गणेश मंदिर, शिवसृष्टी, किल्ले रायगड, भीमाशंकरचे ज्योतिर्लिंग मंदिर, किल्ले प्रतापगड, कोल्हापूरची अंबाबाई मंदिर आणि किल्ले पन्हाळगड पाहता येईल.