जय गणेश! ‘दगडूशेठ’ मंदिरात शहाळे महोत्सव, वैशाख पौर्णिमेला 5000 शहाळ्यांचा महानैवद्य, Video

पुराणांमध्ये वर्णन केलेल्या पुष्टिपती विनायक अवताराच्या स्मरणार्थ हा महोत्सव दरवर्षी साजरा केला जातो. दुर्मती राक्षसाच्या संहारासाठी शंकर-पार्वती यांच्या इच्छेने गणेशांनी घेतलेल्या या अवताराचा उल्लेख ‘श्रीगणेश पुराण’ व ‘मुद्गल पुराण’ यामध्ये आढळतो. वैशाख शुद्ध पौर्णिमेला झालेल्या या अवतारामुळे हा दिवस ‘पुष्टिपती विनायक जयंती’ म्हणून ओळखला जातो.

सकाळी सूर्योदयाच्या वेळी विशेष पूजा व अभिषेक, तसेच गणेशयाग करण्यात आला. पहाटे प्रसिद्ध गायिका सानिया पाटणकर आणि त्यांच्या सहकाऱ्यांनी भक्तिगीतांची गायनसेवा अर्पण केली. गाभारा आणि सभामंडप शहाळ्यांची आकर्षक रचना व हिरवळीने सजवण्यात आला होता.

या दिवशी देशभरात सुख, समृद्धी, आरोग्य, पावसाचे आगमन, दुष्काळ निवारण आणि शेतकऱ्यांच्या समस्या दूर होण्यासाठी प्रार्थना करण्यात आली. या धार्मिक सोहळ्यानंतर दुसऱ्या दिवशी ससून रुग्णालयातील रुग्णांना शहाळ्यांचा प्रसाद वाटप करण्यात येणार आहे, अशी माहिती कोषाध्यक्ष महेश सूर्यवंशी यांनी दिली.