महाराष्ट्रातल्या या गावात लागला 3 दिवसांचा 'लॉकडाउन', घरं सोडून गावकरी गावाबाहेर

आचऱ्यातील बारा वाड्यांतील ग्रामस्थांनी ज्या गावची वेस जवळची तिकडे वस्ती केली आहे. गावपळणीच्या अगोदर दोन दिवसापासूनच ग्रामस्थांनी गुराढोरांना आवश्यक गवत आदी गोष्टी नियोजित निवासस्थानी नेऊन ठेवण्यास सुरुवात केली होती. पारवाडी ग्रामस्थांनी पारवाडी खाडी किनारी झोपड्या उभारुन वस्ती केली आहे. वरचीवाडी भागातील काहींनी भगवंतगड रस्त्यालगतच्या माळरानावर राहुट्यात आपले संसार थाटले आहेत. किनारपट्टी भागातील लोकांनी आडबंदर मुणगे भागात, गाउडवाडी, हिर्लेवाडी ग्रामस्थांनी चिंदर-सडेवाडी भागात तीन दिवस, तीन रात्रीसाठी संसार थाटले आहेत. केवळ राहण्यासाठी आसरा एवढाच उद्देश न ठेवता काहींनी कल्पकतेने या राहुट्यांना आकर्षक सजविण्यात आले आहेत.

संपूर्ण गाव निर्मनुष्य झाला तरी श्री देव रामेश्वराची पुजा अर्चा सुरू असल्याने यासाठी गुरव, ब्राह्मण आणि संबंधित मंदिरात येऊन पुन्हा आपल्या निवासस्थानी वेशीबाहेर जातात. दुपारी आणि सायंकाळी वाजविला जाणारा चौघडा नेहमीच्या ठिकाणी न वाजता मंदिरालगतच्या इमारतीत वाजविला जातो.चाकरमानीही सहभागीया गावपळणीचा आनंद घेण्यासाठी चाकरमानीही मोठ्या प्रमाणात सहभागी झाले आहेत. आचरे गावत पिढ्यानपिढ्या चाललेल्या गावपळण प्रथेमुळे गाव चार ते पाच वर्षांनी तीन दिवस, तीन रात्रीसाठी निर्मनुष्य होत असल्याने गावातील वातावरण निरोगी होण्यासाठी मदत होत आहे. ध्वनी प्रदूषण नाही, सांडपाणी निचरा होत असल्याने अळी पसरविणाऱ्या डासांचा नाश होतो. यासारख्या अनेक बाबींमुळे आचरा गावपळण ही केवळ प्रथा न होता स्वच्छतेसाठी राबविण्यात आलेली मोहीमच म्हटल्यास वावगे ठरणार नाही.