बारामतीच्या नगराध्यक्षपदी जय पवारांच्या नावाची चर्चा, अजितदादांनी सस्पेन्स संपवला, म्हणाले...

पार्थ पवार यांच्यावर पुण्यातील जमीन घोटाळ्याचे आरोप झाल्यानंतर अजित पवार प्रथमच बारामतीला आले होते. बारामती नगर परिषदेच्या निवडणुकांच्या अनुषंगाने पक्षातील नेत्यांची त्यांनी आज बैठक घेतली. इच्छुकांशी निवडणुकीच्या अनुषंगाने चर्चा करून पुढच्या दोन दिवसांत मुलाखती घेऊन उमेदवारांची घोषणा करू, असे अजित पवार यांनी सांगितले.

गेल्या दोन आठवड्यांपासून बारामती नगराध्यक्षपदाची निवडणूक जय पवार लढणार असल्याची जोरदार चर्चा सुरू आहे. समर्थकांकडून समाज माध्यमांवर जय पवार यांच्या नावाचे अभियानही सुरू आहे. बारामतीत जयपर्वाचा प्रारंभ असे म्हणून त्यांचे नाव पुढे केले जात आहे. या सगळ्या चर्चा फेटाळून लावत अजित पवार यांनी तसे काहीही होणार नसल्याचे स्पष्ट केले आहे. पत्रकारांनी सांगितलेल्या चर्चा बारामतीत होतायेत हे खरे आहे मात्र जय पवार हे नगरपालिका निवडणुकीला उभे राहणार नाही, असे थेट संकेत अजित पवार यांनी दिले.

स्थानिक स्वराज्य संस्थांच्या निवडणुका जाहीर झाल्या आहेत. आचार संहिता लागली आहे. सोमवार ते शुक्रवार राज्याचा आढावा घेतला. बारामतीत आज सकाळपासून चाचपणी केली. बारामतीकरांनी मला नेहमी साथ दिली. राजकीय जीवनात काम करताना चढ उतार आले. बारामतीकरांना सांगणार आहे की मी बारामती आणि माळेगाव नगरपंचायतीचा कायापालट करून दाखवेल. काम करून घेण्याची जबाबदारी माझी राहील. उमेदवारी दाखल करायला उद्यापासून सुरुवात होत आहे. बुधवारी मी पुणे शहर आणि ग्रामीण भाग पाहणार आहे. गुरुवारी मी बारामती नगरपरिषद नगराध्यक्षपदासाठी उमेदवारांच्या मुलाखती घेणार आहे. एक मेळावा घेऊन माझी मते मी कार्यकर्त्यांसमोर मांडेन, असे अजित पवार म्हणाले.

चिन्ह वाटप केल्यावर प्रचाराला सहा दिवस राहत आहेत. उमेदवारी दाखल करायला सुरुवात झाली की सभा घेण्याचे नियोजन केले जाईल. मतदारांची संख्या फार काही नसते. बारामतीत मोठ्या प्रमाणात काम करण्याचा प्रयत्न आम्ही महायुती म्हणून केला आहे. अनेक गोष्टी प्रस्तावित आहेत. जेजुरी, सासवड, उरुळी देवाची, दौंड, इंदापूर, खेड, आळंदी, तळेगाव दाभाडे, लोणावळा, जुन्नर या निवडणुकांवरही माझे लक्ष असेल, असेही अजित पवार म्हणाले.