Free Salon Services: समाजासाठी आदर्श! कुष्ठरोगी बांधवांची कटिंग-दाढी करतो मोफत, 11 वर्षांपासून सुरू आहे आकाशचे काम, Video

विदर्भ महारोगी सेवा मंडळ, तपोवनचे अध्यक्ष डॉ. सुभाष गवई यांच्याशी लोकल 18 ने चर्चा केली. तेव्हा ते सांगतात की, दाजीसाहेब या संस्थेत काम करत असताना आमच्याकडे एक बांगड्यांचा व्यवसाय करणारे दादा येत होते. ते नेहमी येऊन आमच्या येथील महिलांच्या थिट्या हातांत बांगड्या भरून देत होते. एकीकडे कुष्ठ बांधवांना कोणी बघत सुद्धा नाही आणि चुडीवालासारखे लोक त्यांची निस्वार्थ सेवा करतात. हा खरंच समाजासाठी आदर्श आहे. 

लहानपणापासून आमच्याकडे शिकत असलेला आकाश गोलरकर. घरची परिस्थिती बेताची होती. त्यामुळे तिन्ही भावंडं आमच्या शाळेतच शिकली. संस्थेने त्यांचे शिक्षण पूर्ण केले. आकाशचे बाबा सुद्धा सलूनचा व्यवसाय करत होते. त्यामुळे 10 वी झाल्यानंतर आकाशने सुद्धा नांदगाव पेठ येथे स्वतःचे सलूनचे दुकान सुरू केले. तेव्हापासून तो आमच्या संस्थेत सेवा देत आहे. जवळपास 300 पुरुष रुग्ण आमच्याकडे आहेत. त्या सगळ्यांची दाढी आकाश करून देतो. त्याचबरोबर बाल संगोपन योजनेतील 60 मुले देखील आहेत. त्यांचीही कटिंग आकाश करतो. तो पैशाची अपेक्षा करत नाही. त्याला दिलेले 5 ते 10 रुपये तो घेतो पण, पैशाची मागणी कधीच करत नाही. आकाश समाजासाठी आदर्श आहे. कारण ज्या थिट्या हातांना कोणीही जवळ घेत नाहीत त्यांची सेवा आकाश करत आहे, असे अध्यक्ष सांगतात.

गेल्या 11 वर्षांपासून सतत सेवा देणाऱ्या आकाशसोबत लोकल 18 ने संवाद साधला. तेव्हा तो सांगतो की मी गेले 20 वर्ष या संस्थेशी जुळलो आहे. माझं शिक्षण या संस्थेने पूर्ण केले. त्यानंतर मी नांदगाव पेठ येथे माझा व्यवसाय सुरू केला. या संस्थेबद्दल मला खूप आदर आहे. या बांधवांच्या परिस्थितीशी मी जाणून आहे. यांना कोणीही हात लावत नाहीत, कारण लोकांमध्ये खूप गैरसमज आहे. ही सर्व माझीच लोक असल्याने त्यांची सेवा म्हणून मी गेले 11 वर्षांपासून करत आहे. जवळपास 300 रुग्ण आणि 60 मुले अशा सर्व लोकांची कटिंग-दाढी करतो. आठवड्यातून 3 दिवस या ठिकाणी मी काम करतो. यांनी सहखुशीने दिलेले 5 ते 10 रुपये मी आनंदाने घेतो. माझी पैशाची काही वेगळी मागणी राहत नाही, असे आकाश सांगतो.