रद्दीच्या पैशांतून मोठं काम, अमरावतीत उभारलं जल मंदिर, कसा होतोय फायदा?

अमरावती : अमरावतीमध्ये गेल्या 17 वर्षापासून अर्हम युवा सेवा ग्रुप हे समाजसेवेत कार्यरत आहे. त्यांच्याकडून अनेक गरजू व्यक्तींना सीजनेबल सेवा पुरवल्या जातात. हिवाळ्यात त्यांनी अनेक गरजू लोकांना ब्लँकेटचे वाटप केलेत. त्याचबरोबर लोकांच्या घरोघरी जावून ते रद्दी गोळा करतात आणि त्याच रद्दीच्या पैशातून गरजू विद्यार्थ्यांना शिक्षणात सुद्धा मदत करतात. आता उन्हाळ्यात त्यांनी अमरावतीमध्ये दोन ठिकाणी अर्हम जल मंदिर सुरू केले आहे. त्यामाध्यमातून अनेक लोकांची तहान भागवली जात आहे. त्याचबरोबर प्राणी आणि पक्षांसाठी त्यांनी घरोघरी मातीचे भांडे सुद्धा वाटप केले आहेत.

अर्हम युवा सेवा ग्रुपच्या माध्यमातून केल्या जाणाऱ्या कार्याबाबत दिपिका यांच्याशी लोकल18 ने चर्चा केली. तेव्हा त्या सांगतात की, परम गुरुदेव श्री नम्रमुनी महाराज साहेब यांनी 2005 मध्ये अर्हम युवा सेवा ग्रुपची स्थापना केली. जेव्हा मुलुंडमध्ये पुर आला होता तेव्हा जनजीवन विस्कळित झाले. त्यावेळी परम गुरुदेव श्री नम्रमुनी महाराज साहेब यांना विचार आला की, सामान्य लोकांना मदत करण्यासाठी कोणी तरी असायला पाहिजे? गरजू लोकांच्या भावना, संवेदना समजून घेईल अशा लोकांचा ग्रुप आपण तयार केला तर त्यातून जिवदया आणि मानवतेचे कार्य होईल. त्यासाठी त्यांनी अर्हम युवा सेवा ग्रुपची स्थापना केली. 2008 मध्ये अमरावतीत या ग्रुपची प्रचिती झाली आणि कार्य करण्यास सुरुवात झाली.