सुनेत्रा पवारांच्या शासकीय चालकाला उतरवलं, स्टेअरिंग हाती घेतलं, तटकरेंवर टीका, अनिकेत म्हणतात...

चिपळूणचे राष्ट्रवादीचे आमदार शेखर निकम यांच्या मुलीच्या विवाह सोहळ्यासाठी काल (२० फेब्रुवारी रोजी) सुनेत्रा पवार सावर्डे येथे गेल्या होत्या. हेलिकॉप्टरमधून उतरल्यानंतर सुनेत्रा पवार विवाहस्थळी जायला निघालेल्या असताना त्यांच्या गाडीचे सारथ्य अनिकेत तटकरे यांनी केले. प्रोटोकॉल तोडून काही घातपात झाला असता तर काय केले असते, अशी टीका शरद पवार यांच्या राष्ट्रवादीकडून केली जात आहे. त्यांच्या टीकेला अनिकेत तटकरे यांनी उत्तर दिले.

मी नेहमीच पवार कुटुंबात वावरलेलो आहे. मात्र आमच्या भागात आल्याने सुनेत्रा पवार यांच्या गाडीचे सारथ्य करण्याचे भाग्य मला लाभले. कोणाच्या पोटात पोटशूळ उठत असेल तर ते मला समजले नाही. काकींना माझ्यावर अधिक विश्वास आहे, असे अनिकेत तटकरे म्हणाले.

राष्ट्रवादीचे माजी आमदार अनिकेत तटकरे यांची उपमुख्यमंत्री सुनेत्रा पवार यांच्या चिपळूण दौऱ्याप्रसंगी वाहन चालवताना व्हिडिओ व्हायरल झाला. यानंतर शरद पवार गटाच्या राष्ट्रवादीकडून आक्षेप घेण्यात आला. अनिकेत तटकरे यांना मोठ्या प्रमाणात ट्रोल करण्यात आलं. मात्र या टीकेला उत्तर देताना अनिकेत तटकरे म्हणाले, "आम्ही तटकरे कुटुंब नेहमीच पवार कुटुंबाच्या सोबत वावरलो आहे. त्यामुळे त्यांच्या वाहनाचे सारथ्य करण्याचे काम गैर असल्याचे मला वाटत नाही. कारण याआधी सुद्धा मी अजित पवार यांच्यासह अन्य नेते मंडळींच्या वाहनांचे स्टेअरिंग हाती घेतलं आहे आणि त्याचे मला भाग्य लाभल्याने जर का कोणाच्या पोटात पोटशूळ होत असेल तर मला याबाबत मी याबाबत काय करू शकतो?"