16 लाखांच्या जमिनीची किंमत दोन तासात 32 लाखांवर, खरातच्या आश्रमाचा नवा कारनामा समोर

नारायण हेटे नावाचा व्यक्ती खरातवर कशी खैरात करत होतं, हे कुंभारांनी पुराव्यानिशी मांडण्याचा प्रयत्न केला. त्यांनी सादर केलेल्या कागदपत्रांनुसार, नरेंद्र हेटे यांनी एका दिवशी 5 एकर जमीन विकत घेतली. या जमिनीचा बाजारभाव 16 लाख रुपये दाखवण्यात आला, तर प्रत्यक्ष खरेदी 24 लाख रुपयांत झाली. मात्र, धक्कादायक बाब म्हणजे, खरेदीखत झाल्यानंतर अवघ्या दीड ते दोन तासांच्या आत हीच जमीन अशोक खरातच्या ट्रस्टला 'दान' म्हणून देण्यात आली. विशेष म्हणजे दान करताना या जमिनीची किंमत थेट 32 लाख रुपये दाखवण्यात आली. अवघ्या काही तासांत जमिनीचे मूल्य 16 लाखांनी कसे वाढले? हा सवाल त्यांनी उपस्थित केला आहे.

नरेंद्र नारायण हेटे हे नाव कॉर्पोरेट विश्वात मोठे आहे. ते तब्बल 100 कंपन्यांमध्ये आजी-माजी संचालक किंवा भागीदार आहेत. त्यातील काही कंपन्या सक्रिय आहेत, तर काही 'स्ट्राईक ऑफ' किंवा 'इनॅक्टिव्ह' स्वरूपात आहेत. इतका मोठा व्यावसायिक अनुभव असलेली व्यक्ती एका भोंदू बाबाच्या संस्थेला अशा प्रकारे जमीन दान का करते आणि त्यामागे कोणते आर्थिक हितसंबंध दडलेले आहेत, याचा शोध घेण्याची मागणी विजय कुंभार यांनी केली आहे.

खरातच्या अब्जावधींच्या संपत्तीत हे 32 लाख रुपये म्हणजे समुद्रातील एका थेंबासारखे आहेत. मात्र हा प्रकार दाखवतो की पैशांचा खेळ कागदोपत्री कसा रचला जातो! हा संपूर्ण प्रकार अत्यंत संशयास्पद असून सखोल चौकशी होणे अत्यावश्यक आहे.बरेच मोठे मासे गळाला लागण्याची शक्यता देखील विजय कुंभार यांनी व्यक्त केली आहे. या नव्या आरोपांमुळे मोठी खळबळ उडाली आहे.