Ashok Kharat : अशोक खरातचा कथित मॅनेजर रमेश हिंगे मीडियासमोर, "रविवारी मंदिरात जायचो, तिथं...'', केला मोठा दावा

रमेश हिंगे यांनी सांगितले की, ते पेशाने शिक्षक आहेत. "रविवारी जेव्हा मला शाळेला सुट्टी असायची, तेव्हा मी श्रद्धेपोटी मंदिरात 'स्वयंसेवक' म्हणून जात होतो. त्या पलीकडे माझा खरातच्या कोणत्याही अघोरी कृत्यांशी किंवा व्यवहारांशी संबंध नाही," असे त्यांनी स्पष्ट केले. गुन्हा दाखल झाल्यापासून हिंगे फरार असल्याची चर्चा नाशिकमध्ये रंगली होती, मात्र आज त्यांनी समोर येऊन सर्व आरोप फेटाळून लावले आहेत.

खरातच्या 'ओकस प्रॉपर्टीज' आणि इतर व्यवहारांत हिंगे यांचा सहभाग असल्याचा संशय व्यक्त केला जात होता. मात्र, हिंगे यांनी स्वतःहून समोर येत आपली बाजू मांडल्याने आता या प्रकरणाला नवे वळण मिळाले आहे. पोलीस आता हिंगे यांच्या या दाव्याची शहानिशा करणार असून, खरातच्या काळ्या साम्राज्यात त्यांचा खरोखरच सहभाग होता की ते केवळ एक भक्त होते, हे तपासाअंती स्पष्ट होईल.

नाशिकमधील वादग्रस्त 'भोंदू' अशोक खरातच्या अघोरी कृत्यांचा तपास आता त्याच्या अफाट संपत्तीकडे वळला आहे. अवघ्या १०-१२ वर्षांत खरातने तब्बल १५०० कोटी रुपयांची माया जमवल्याची धक्कादायक माहिती समोर येत आहे. नाशिक सायबर विभागाने आता 'नॅटग्रीड' (NATGRID) या शक्तिशाली ॲप्लिकेशनच्या साहाय्याने खरातच्या बँक खात्यांचे धागेदोरे शोधण्यास सुरुवात केली आहे.