BJP Shiv Sena UBT Clash: मुंबईत प्रचाराला गालबोट, भाजप-ठाकरे गटाच्या कार्यकर्त्यांमध्ये हाणामारी, राड्यानंतर पोलीस अॅक्शन मोडवर

साकीनाका परिसरातील चांदिवली येथील संघर्षनगरमध्ये आयोजित ठाकरे गटाच्या चौक सभेदरम्यान भाजप आणि शिवसेना ठाकरे गटाच्या कार्यकर्त्यांमध्ये तणाव निर्माण होऊन धक्काबुक्की व शिवीगाळ झाली. ही घटना मंगळवारी (६ जानेवारी) रात्री घडली. या प्रकरणी साकीनाका पोलिसांनी दोन्ही पक्षांच्या कार्यकर्त्यांविरोधात गुन्हा दाखल केला आहे.

पोलिसांनी दिलेल्या माहितीनुसार, संघर्षनगर येथे ठाकरे गटाची चौक सभा आयोजित करण्यात आली होती. सभेसाठी खुर्च्यांची मांडणी सुरू असतानाच भाजपच्या उमेदवार आशा तायडे यांच्या प्रचारासाठी आलेले काही कार्यकर्ते सभास्थळी मागील बाजूने आले. यावेळी दोन्ही पक्षांच्या कार्यकर्त्यांमध्ये वादाला सुरुवात झाली. सुरुवातीला शाब्दिक चकमक झाली, मात्र काही वेळातच परिस्थिती चिघळून धक्काबुक्की व हाणामारी झाली, असा आरोप तक्रारीत करण्यात आला आहे.

ठाकरे गटाचे कार्यकर्ते राहुल सुर्वे यांनी दिलेल्या तक्रारीनुसार, या घटनेत भाजपचे विजू कोळी, वैशाली वैताडे, अनिष जाधव आणि सचिन जाधव यांचा सहभाग होता. या प्रकरणात पोलिसांनी राहुल सुर्वे यांच्यासह संबंधित सर्व कार्यकर्त्यांविरोधात परस्परविरोधी तक्रारींच्या आधारे गुन्हे दाखल केले आहेत.

दरम्यान, या घटनेचा सखोल तपास साकीनाका पोलिसांकडून सुरू असून परिसरातील सीसीटीव्ही फुटेज तपासण्यात येत आहे. तसेच प्रत्यक्षदर्शींचे जबाब नोंदवून घटनेची वस्तुस्थिती स्पष्ट करण्याचा प्रयत्न केला जात असल्याची माहिती पोलिसांनी दिली आहे.