वेडी वाकडी विधाने करून आम्हाला अडचणीत आणू नका, अजितदादांनी शिंदे गटाच्या आमदाराचे कान टोचले

काँग्रेसचे नेते तथा विरोधी पक्षनेते राहुल गांधी यांची जीभ कापणाऱ्याला ११ लाखांचे बक्षीस देईन, असे वादग्रस्त वक्तव्य शिंदे गटाचे आमदार संजय गायकवाड यांनी केले. त्यांच्या विधानावर देशभरातून आक्षेप नोंदविण्यात आले. त्यामुळे महायुतीच्या नेत्यांची प्रचंड कोंडी झाली. हाच धागा पडडून अजित पवार म्हणाले, वेडी वाकडे विधाने करून कृपया मुख्यमंत्री शिंदे, उपमुख्यमंत्री फडणवीस आणि मला अडचणीत आणू नका. वाचाळवीरांनी बोलताना जरा मर्यादा पाळणे आवश्यक आहे. भाषा वापरताना थोडी काळजी घ्या. राग आम्हालाही येतो पण व्यक्त होताना जरा मर्यादा पाळणे आवश्यक असते, अशा शब्दात अजित पवार यांनी गायकवाड यांना खडसावले.

लाडकी बहीण योजनेच्या माध्यमातून आम्ही आमच्या भगिनींना आर्थिक संपन्न करत आहोत. त्यांच्या सबलीकरणाचा प्रयत्न शासनाच्या माध्यमातून सुरू आहे. मात्र ही योजना बंद करण्याचे षडयंत्र विरोधक रचत आहेत. म्हणूनच लाडकी बहीण योजना सुरू राहावी असे वाटत असेल तर महायुतीला मतदान करा, असे आवाहन अजित पवार यांनी केले. त्याचवेळी विरोधकांच्या भुलथापांना बळी पडू नका, लाडकी बहीण योजना सुरूच राहील, असेही अजित पवार यांनी उपस्थितांना आश्वस्त केले.

राहुल गांधी यांची आरक्षण काढण्याची भाषा चुकीची आहे. लोकसभा निवडणुकीत त्यांनीच फेक नरेटिव्ह पसरविले. मोदींजींच्या नेतृत्वाखालीचे सरकार निवडून आले तर आरक्षण काढून घेतले जाईल, असा प्रचार त्यांनीच केला. मात्र आता त्यांच्याच तोंडात आरक्षण काढून घेण्याची भाषा आहे, अशी टीका अजित पवार यांनी केली.