Chhatrapati Sambhajinagar: बँकेत अधिकारी, पण 'त्या' ऑफरला फसली, आता सगळंच गेलं, पश्चातापाची वेळ

छत्रपती संभाजीनगर शहरातील एन-11, सुदर्शननगर, टीव्ही सेंटर, हडको भागात राहणाऱ्या दीपाली विजय कोलते (वय 28) या आयसीआयसीआय बँकेत रिलेशनशिप मॅनेजर म्हणून नोकरी करतात. 24 नोव्हेंबरला त्यांच्या मोबाईलवर व्हॉट्सॲपवरून एनएसईच्या एचआर विभागाच्या नावानं संदेश आला. पुढील संपर्कासाठी टेलिग्राम ॲपवर बोलावण्यात आलं. तिथं ‘रंजिता विजयवर्गिया’ या नावाच्या अकाऊंटवरून पार्टटाईम जॉबची ऑफर देण्यात आली. विश्वास बसावा म्हणून एनएसई ऑफिसचे फोटो, कंपनीचं लेटरहेड आणि माहिती पाठवण्यात आली. पहिल्या दिवशी हॉटेल्सच्या फोटोंना पाच-स्टार रेटिंग देण्याची 20 कामं देण्यात आली. ती कामं पूर्ण करताच थेट बँक खात्यात 200 रुपये जमा झाले. त्यामुळे संशय कमी झाला.

दुसऱ्या दिवशीही अशीच कामं देण्यात आली. मात्र तिसऱ्या टास्कला अडचण आली. 800 रुपये भरले तर 30 टक्के कमिशन मिळेल, असं सांगून क्यूआर कोडवर पैसे भरायला लावले. त्यानंतर एनएसईच्या लिंकवरून रजिस्ट्रेशन करून घेतलं. पुढे ‘विकास यादव’ या अकाऊंटवरून गोल्ड खरेदी–विक्रीचं ट्रेडिंग असल्याचं सांगत नवनवीन टास्क दिले गेले. टास्क पूर्ण झाल्यावर ‘अपेक्षा पांडे’ या नावाच्या अकाऊंटवरून सेटलमेंट होईल, असं सांगत आणखी रक्कम भरण्यास भाग पाडण्यात आलं.