Jayakwadi Dam: मराठवाड्यातील शेतकऱ्यांना दिलासा, जायकवाडी कालव्यातून आज सुटणार पाणी

छत्रपती संभाजीनगर : गेल्या काही काळात मराठवाड्यात मान्सूनने ओढ दिली आहे. त्यामुळे खरीपाच्या पेरण्या वाया जाण्याची भीती असून पाणीटंचाई निर्माण झाली आहे. आता संकटात सापडलेल्या शेतकऱ्यांसाठी दिलासादायक बातमी आहे. जायकवाडी धरणातून पाणी सोडण्याचा निर्णय घेण्यात आला आहे. याबाबत जलसंपदा मंत्री राधाकृष्ण विखे पाटील यांच्या अध्यक्षतेखाली मराठवाड्यातील आमदारांची मुंबईत बैठक झाली. त्यानंतर जायकवाडीच्या डाव्या आणि उजव्या कालव्यातून पाणी सोडण्यात येणार असल्याची माहिती कडाचे अधिक्षक अभियंता एस. के. सब्बीनवार यांनी दिली.