Ladki Bahin Yojana: लाडकी बहीण योजनेबाबत महत्त्वाचं अपडेट, नव्याने पात्र बहिणींना कधी मिळणार लाभ?

मुख्यमंत्री माझी लाडकी बहीण ही योजनेची महायुती सरकारने 28 जून 2024 रोजी घोषणा केली. त्यासाठी 1 जुलै ते 15 ऑक्टोबर 2024 पर्यंत अर्ज करण्याची मुदत होती. या काळात सुमारे अडीच कोटी महिलांनी अर्ज केले होते. त्यांना या योजनेद्वारे आर्थिक मदत देखील मिळाली. मात्र, विधानसभा निवडणुकीनंतर जवळपास 13 लाखांहून अधिक महिला या योजनेतून अपात्र ठरवण्यात आल्या. अपात्र महिलांना सुमारे 900 कोटी रुपयांचा लाभ देण्यात आला असून अपात्र लाभार्थ्यांचा डेटा प्राप्तिकर विभागाकडून गोळा केला जातोय.

लाडकी बहीण योजनेतून मिळणाऱ्या पैशांचा वापर सामूहिक उन्नतीसाठी करणाऱ्या महिला गटांना प्रोत्साहन देण्यात येईल. तसेच त्यासाठी विशेष योजना आखण्याची घोषणा सरकारने केली होती. मात्र, ही योजना नेमकी काय असेल व ती कधीपासून अमलात येईल, याबाबत अद्याप स्पष्टता आलेली नाही.

नव्याने पात्र झालेल्या महिलांना लाडकी बहीण योजनेचा अर्ज करण्याची प्रक्रिया सुरू झालेली नाही. राज्य मंत्रिमंडलाने याबाबत निर्णय घेतल्यानंतरच नव्याने पात्र महिला अर्ज करू शकतील. मात्र, याबाबत अद्याप कोणतीही हालचाल नाही. “मूळ शासन निर्णयात जी मुदत होती, त्याची अंमलबजावणी आम्ही केली. अर्ज पुन्हा सुरू करण्याबाबत मंत्रिमंडळच निर्णय घेईल,” असे महिला व बालकल्याणंत्री आदिती तटकरे यांनी सांगितले.