Maharashtra CM : मुख्यमंत्रिपदावरून रस्सीखेच, 48 तासात वाढले शिंदे-फडणवीसांचे आमदार, वर्षावर कोण जाणार?

विधानसभा निवडणुकीत भाजपनं जबरदस्त कामगिरी केली आहे. देवेंद्र फडणवीसांच्या नेतृत्वात घवघवीत यश मिळावलं आहे. त्यांची विधानसभेसाठी आखलेली रणनीती यशस्वी करुन दाखवली, तसेच विधानसभेत आपलं संख्याबळ वाढवण्याचे प्रयत्न सुरु केले आहेत.

एकीकडे भाजप फडणवीसांच्या नावासाठी आग्रही आहे तर दुसरीकडे शिवसेनेने एकनाथ शिंदेंचं नाव लावून धरलं आहे. महायुतीनं विधानसभेची निवडणूक मुख्यमंत्री एकनाथ शिंदेंच्या नेतृत्वात लढवली होती. लोकसभेत महायुतीची मोठी पिछेहाट झाली होती, पण विधानसभेत महायुतीनं बाजी उलटवली. शिंदेंच्या नेतृत्वात विधानसभेत महायुतीला घवघवीत यश मिळालं. लाडकी बहीण योजनेच्या माध्यमाधून शिंदेंनी महायुतीच्या बाजूनं जनमत वळवण्यात यश मिळवलं. खरं तर उद्धव ठाकरेंच्या शिवसेनेचं आव्हान असतानाही शिंदेंनी विजयश्री खेचून आणली. ही शिंदेंच्या बाजूनं जमेची असल्याचा दावा शिवसेनेकडून केला जात आहे. दरम्यान शिंदेंनी अपक्षांना गळाला लावून विधानसभेत आपलं संख्याबळ वाढवण्यास सुरुवात केली आहे.

रविवारी लाडकी बहीण योजनेच्या लाभार्थी महिलांनी मुख्यमंत्री एकनाथ शिंदेंचं अभिनंदन केलं, यावेळी मुख्यमंत्रिपदी पुन्हा एकनाथ शिंदेच अशी जोरदार घोषणाबाजी करण्यात आली होती. इकडे मुख्यमंत्री आरोग्य सहाय्यता निधीच्या लाभार्थ्यांनी सिद्धिविनायक मंदिरात जावून शिंदे मुख्यमंत्री व्हावेत म्हणून साकडं घातलं. या सगळ्या घडामोडी पाहाता मुख्यमंत्रिपदावरून स्पर्धा तीव्र झाली आहे.