काँग्रेसमधला हायहोल्ट्रेज ड्रामा, नगरसेवकही पोहोचले दिल्ली दरबारी, वडेट्टीवार-धानोरकर आमनेसामने; बैठकीत काय घडलं?

मागील काही दिवसांपासून चंद्रपूर पालिकेत सत्ता स्थापन करण्यावरून काँग्रेसचे आमदार विजय वडेट्टीवार आणि खासदार प्रतिभा धानोरकर यांच्यात वाद पेटला आहे. दोन्ही नेत्यांनी निवडून आलेले आपले समर्थक नगरसेवक वेगवेगळ्या ठिकाणी ठेवले होते. वडेट्टवार यांनी आपले समर्थक नगरसेवक आपल्यासोबत ठेवले होते. आज दिल्लीत सगळ्या समर्थक नगरसेवकांना घेऊन वडेट्टीवार दिल्लीत पोहोचले. एका मिनी बसमध्ये सगळ्या नगरसेवकांनी घेऊन ते पोहोचले होते. जवळपास 19 नगरसेवक हे वडेट्टीवार यांच्यासोबत होते.

चंद्रपूर महानगरपालिकेतील जवळपास काँग्रेसचे 19 आणि 2 अपक्ष नगरसेवक दिल्लीत दाखल झाले होते. जवळपास 45 मिनिटं बैठक झाली. राजधानी दिल्लीतील 51 लोधी इस्टेट इथं ही बैठक झाली. काँग्रेस पक्षाचा महापौर होईल हे बैठकीत दोन्ही नेत्याकडून वदवून घेण्यात आले.  यामुळे चंद्रपूर महानगरपालिकेचा महापौराचा मार्ग मोकळा झाला आहे.  महापौरपद हे वडेट्टीवार यांच्या गटाला मिळते का हे पाहणे आता महत्वाचे ठरणार आहे. नगरसेवकांच्या संख्येच्या आधारावर निर्णय घेण्यात येणार आहे.