ऑनलाईन गेम खेळून कर्ज, शाखाधिकाऱ्याने बनाव रचला, २५ लाख लुटले, स्वत:वर वार केले, पण पर्दाफाश झालाच!

कैलास घाटे असे या शाखाधिकाऱ्याचे नाव असून, त्याला ऑनलाईन गेम आणि खाजगी देणे झाले होते. त्याच कारणामुळे त्याने ही रक्कम स्वतःजवळ ठेवून लुटीचा बनाव रचल्याची कबुली पोलिसांना त्याने दिली आहे. धक्कादायक म्हणजे, चोरट्यांनी हल्ला केल्याचे भासवण्यासाठी त्याने स्वतःच्या अंगावर शस्त्राने वार करून घेतले होते.

नळदुर्ग येथील लोकमंगल को-ऑपरेटिव्ह सोसायटीचा शाखाधिकारी कैलास घाटे याने ३० जून रोजी पोलिसांना माहिती दिली की, तो २५ लाख रुपयांची रोकड सोलापूर येथील मुख्य कार्यालयात जमा करण्यासाठी दुचाकीवरून जात होता. राष्ट्रीय महामार्ग क्रमांक ६५ वर चापला तांड्याजवळ पाठीमागून दुचाकीवर आलेल्या दोघांनी त्याला ओव्हरटेक करून डोळ्यात मिरचीची पूड फेकली. डोळ्यात मिरची गेल्याने घाटेने दुचाकी थांबवली असता, चोरट्यांनी पैशांची बॅग हिसकाविण्याचा प्रयत्न केला. घाटेने प्रतिकार केला असता चोरट्यांनी त्याच्या छाती, पाठ आणि उजव्या खांद्यावर वार करून २५ लाखांची रोकड असलेली बॅग घेऊन पलायन केल्याचा बनाव त्याने रचला होता.

या घटनेनंतर नळदुर्ग पोलिस स्थानिक गुन्हे शाखेने काही तासातच हा तपास सुरू केला. पोलिसांच्या तपासात हा शाखाधिकारी उघडा पडला. शाखाधिकार्‍याकडून त्याने लपवलेली रक्कम ही जप्त केली असून त्याला अटक देखील केली आहे.