Water Crisis : जलसंधारण विभागाचा नकार; तरी धाराशिवचे आरक्षित पाणी लातूरला; एका फोनने बदलला निर्णय

लोहारा तालुक्यातील माकणी येथील निम्न तेरणा प्रकल्पातील पाणी लातूर जिल्ह्यातील औसा तालुक्याला सोडण्याचा निर्णय आज घेण्यात आला. उपमुख्यमंत्री देवेंद्र फडणवीस यांना या बैठकीत फोन लावण्यात आला, त्याला लागलीच मंजुरी ही देण्यात आली. आज धाराशिव जिल्ह्याचे जिल्हाधिकारी सचिन ओंबासे, औसाचे आमदार अभिमन्यू पवार, धाराशिवचे खासदार ओमराजे निंबाळकर यांच्या उपस्थितीत पाणी मागणीची बैठक झाली. त्यात जलसंधारण विभागाने पाणी देणे शक्य नसल्याचे सांगितले. तरी देखील विशेष बाब म्हणून हे पाणी मंजूर करण्यात आले आहे. धाराशिव जिल्ह्यात टंचाईच्या झळा तीव्र झाल्या असून धरणात केवळ आठ टक्के पाणीसाठा उपयुक्त आहे. असे असताना देखील अभिमन्यू पवार यांनी आपले राजकीय वजन वापरत धाराशिव जिल्ह्याचे पाणी लातूरला पळवले असल्याचे चर्चा धाराशिव जिल्ह्यात रंगताना पाहायला मिळत आहे.