जायकवाडी धरण 87 टक्के भरले, पूर क्षेत्रातील या गावांना पोलिसांनी दिला महत्त्वाचा इशारा

जालना : मराठवाड्यात मागील 2 दिवसांपासून होत असलेल्या मुसळधार पावसामुळे तसेच नाशिक जिल्ह्यामध्ये होत असलेल्या धुवाधार पावसामुळे गोदावरी नदीला पूर आला आहे. यामुळे जायकवाडी धरणात मोठ्या प्रमाणात पाणीसाठा वाढला आहे. या पाणीसाठ्यामुळे आता जायकवाडी धरण 87 टक्के भरले आहे.

जायकवाडी धरणामधून कधीही पाण्याचा विसर्ग सोडला जाऊ शकतो, त्यामुळे नदीकाठच्या गावांना पैठण पोलिसांनी सतर्कतेचा इशारा दिला आहे. याबाबतच्या परिस्थितीचा घेतलेला हा आढावा.

जायकवाडी प्रकल्पाच्या पाणलोट क्षेत्रात सर्वत्र पाऊस सुरू आहे. त्यामुळे जायकवाडी धरणात पाण्याची आवक वाढणार आहे. उपरोक्त पार्श्वभूमीवर पाणलोट क्षेत्रातील पाऊस आणि जायकवाडी धरणाच्या उर्ध्व भागातील धरणातून जायकवाडी धरणाकडे येणारी आवक विचारात घेऊन यापुढे कोणत्याही क्षणी जायकवाडी धरणामधुन गोदावरी नदीपात्रात विसर्ग सुरू करण्यात येईल.