20 रुपयांत मिळतायेत घटस्थापनेसाठी घट, जालन्यातील या ठिकाणाला नक्की द्या भेट

जालना शहरातील नूतन वसाहत भागात राहणारे विलास लावरे मागील 27 वर्षांपासून नवरात्रीसाठी आवश्यक असणारे घट आणि धान्य उगवण्यासाठी आवश्यक कुंडी विक्री करतात. नवरात्र उत्सव तोंडावर असल्याने ग्राहकांचा चांगला प्रतिसाद मिळत असल्याचं लावरे यांनी सांगितलं. नवरात्र उत्सवासाठी साहित्य बरोबरच त्यांच्याकडे मातीची चूल, भाजी शिजवण्यासाठीचे भांडे, पणती, धूप असे विविध साहित्य उपलब्ध आहे. स्टेनलेस स्टीलच्या तुलनेत मातीच्या भांड्यात शिजवलेले अन्न हे जास्त पौष्टिक आणि आरोग्यदायी असते. त्यामुळे शहरातील नागरिकांचा कल देखील मातीच्या भांड्यांकडे वाढला असल्याचं लावरे यांनी सांगितलं.

नवरात्रीसाठीचे घट 20 रुपयांपासून 25 रुपयांपर्यंत उपलब्ध आहेत. तर भाजी शिजवण्यासाठी तवली 40 ते 50 रुपये, पाणी थंड ठेवण्यासाठी छोटा माठ 80 ते 90 रुपये, मातीची चूल 50 ते 60 रुपये, आरतीसाठीची धूप 40 रुपयांत उपलब्ध आहे. विलास लावरे यांच्याकडे जालना जिल्ह्यातील पिरकावल्यान येथून माती पासून बनवलेल्या वस्तू येतात. मागील 27 वर्षांपासून लावरे हे नूतन वसाहत भागात माती पासून बनवलेले भांडे विकत आहेत. नवरात्र उत्सव आणि दिवाळीच्या तोंडावर व्यवसाय चांगला चालत असल्याचे लावरे यांनी सांगितलं.