Kolhapur Shiv Sena UBT: कोल्हापुरात राडा! ठाकरेंचा नेता काँग्रेसचा स्वीकृत नगरसेवक, शिवसैनिकांकडून घरlवरच धडक, ‘’तुम्ही शिवसेनेला...’’

कोल्हापूर महानगरपालिकेच्या स्वीकृत नगरसेवकपदी शहरप्रमुख सुनील मोदी यांची निवड झाल्यानंतर वादाला सुरुवात झाली. परिवहन समितीमध्ये विशाल देवकुळे यांचे नाव डावलण्यात आल्याचा आरोप समर्थकांनी केला आहे. निष्ठावान शिवसैनिकांना डावलून मोदींनी स्वतःची सोय लावल्याची भावना कार्यकर्त्यांमध्ये निर्माण झाली. याच संतापातून देवकुळे यांच्या समर्थकांनी थेट सुनील मोदींच्या निवासस्थानी धाव घेत त्यांना जाब विचारला.

यावेळी मोदींच्या घराबाहेर मोठा गोंधळ उडाला. "सुनील मोदी हे पक्षात राहून काँग्रेससाठी काम करत आहेत. त्यांनी कोल्हापुरातून उद्धव ठाकरेंची शिवसेना संपवण्याचा विडा उचलला आहे," अशा तीव्र शब्दांत विशाल देवकुळे यांनी आपला संताप व्यक्त केला. या आंदोलनामुळे परिसरात काही काळ तणावाचे वातावरण निर्माण झाले होते.

एकीकडे विधानसभा आणि स्थानिक स्वराज्य संस्थांच्या निवडणुकांचे वारे वाहत असतानाच, ठाकरे गटातील हा गटबाजीचा स्फोट पक्षासाठी चिंतेचा विषय ठरू शकतो. सुनील मोदींनी अद्याप या आरोपांवर कोणतीही अधिकृत प्रतिक्रिया दिलेली नाही. मात्र, या घटनेमुळे कोल्हापुरातील राजकीय वर्तुळात मोठी खळबळ उडाली आहे.