आई-वडिलांचं छत्र हरवलं, व्यवसाय करत पूर्ण करतोय शिक्षण, एकट्याने उभी केली नर्सरी

कोल्हापूर : जीवनात आपल्या पाठीशी आपल्या आई-वडिलांची साथ असेल तर आपण पुढे वाटचाल करण्यास नेहमीच प्रोत्साहित राहत असतो. अशातच मध्येच आई-वडिलांची साथ सुटली, तर बरेच जण आयुष्यात तुटून जातात. मात्र कोल्हापुरातील एक तरुण आई वडिलांच्या निधनानंतर अगदी कमी वयातच वाट्याला आलेले दुःख बाजूला सारत स्वतःच्या पायावर उभारण्याचा यशस्वी प्रयत्न करत आहे. आई-वडिलांच्या छत्राविना जगत असतानाच तो स्वतःची एक छोटेखानी नर्सरी चालवत आहे. मात्र विशेष म्हणजे व्यवसाय करत असताना स्वतःचे शिक्षणही त्याने थांबू दिलेले नाही.

कोल्हापूरच्या राजारामपुरीच्या तेराव्या गल्लीत घाटगे कुटुंबातील यश हा तरुण राहतो. 2021 मध्ये यश अकरावीमध्ये शिकत असताना फक्त 3 महिन्यांच्या अंतरातच त्याची आई आणि नंतर वडील असेल दोघांचेही निधन झाले. तरुण वयातच आई बापाचे छत्र हरपल्यानंतर यशला काय करावे, हेच सुचत नव्हते. मात्र एकाकी जीवन जगताना यशला बहीण आणि दाजींनी खंबीर साथ दिली. त्यामुळेच अर्थार्जनासाठी त्याने विविध पर्याय अवलंबले. राहण्यासाठी स्वतःचे घर असले तरी बाकीच्या सर्व गोष्टी त्याला स्वतः एकट्यालाच कराव्या लागत होत्या. त्यामुळे विविध ठिकाणी काम करत त्याने आपले शिक्षण सुरूच ठेवले. त्यामुळेच त्याला आजूबाजूच्या लोकांकडूनही प्रोत्साहन मिळत आहे.