'अन्नदान हेच श्रेष्ठ दान'! रुग्णांच्या नातेवाईकांना मिळतो रोज मोफत भोजनाचा लाभ, कोल्हापुरात कसा चालतो स्तुत्य उपक्रम? 

कोल्हापूर : असे म्हणतात की, भुकेल्याला अन्नदान केल्यास पुण्य लाभते. पोटात अन्न गेल्यानंतर आपसूकच त्यांच्या तोंडून देणाऱ्यासाठी शुभाशिर्वाद निघत असतात. तर रोजच्या रोज मोफत अन्नदानाचे काम कोल्हापुरातील काहीजण एका मुंबईच्या संस्थेच्या मदतीने करत आहेत. कोल्हापूरच्या छ्त्रपती प्रमिलाराजे सर्वोपचार रुग्णालयाच्या परिसरात हे अन्नदान केले जाते. दररोज अन्नदान सुरु होण्याआधीच या ठिकाणी गरजू लोक वाट पाहत थांबलेले असतात.

कोल्हापुरातील सीपीआर जिल्हा रुग्णालयाला थोरला दवाखाना म्हणूनच ओळखले जाते. हे दवाखान्यात जिल्हा त्याचबरोबर आसपासच्या भागातील देखील रुग्ण उपचारासाठी येत असतात. बरेचसे रुग्ण आहे ग्रामीण भागातील असल्यामुळे कित्येकांच्याकडे चहा- नाश्ता करण्यासाठी सुद्धा पैसे नसतात. आपल्या नातेवाईकांच्या उपचारासाठी आलेल्या कोल्हापूरच्या राहुल कदम यांनी ही सगळी परिस्थिती जवळून बघितली होती. त्यामुळे त्यांनी त्यांच्या माऊली सोशल सर्कलच्या माध्यमातून 15 ऑगस्ट 2022 पासून दर शनिवार, रविवार असे आठवड्यातून दोन दिवस सीपीआर रुग्णालय परिसरात मोफत अन्न वाटप सुरु केले होते. मात्र हळूहळू पुढे  येऊ लागलेल्या अडचणींमुळे त्यांना हा जनता भोजनचा उपक्रम थांबवण्याची वेळ आली. पण त्यावेळी मुंबईच्या विथ आर्या या संस्थेने त्यांना मदत केली. तेव्हापासून आजतागायत आठवड्यातून दोन दिवस चालणारा जनता भोजनचा उपक्रम आता दररोज सुरू असतो अशी माहिती राहुल यांचा भाऊ दीपक कदम यांनी दिली आहे.