Eknath Shinde : मंत्रिपदाच्या तिढ्यानंतर एकनाथ शिंदेंची सुरू होणार तारेवरची कसरत, कोणतं आहे मोठं आव्हान?

विधानसभा निवडणुकीत महायुतीला प्रचंड बहुमत मिळाले. भाजपला सर्वाधिक 132 जागा मिळाल्या. तर, एकनाथ शिंदे यांच्या नेतृत्वातील शिवसेनेला 57 जागांवर विजय मिळाला. निवडणूक निकालानंतर मुख्यमंत्री कोण असणार, यावर खल सुरू झाला होता. त्यानंतर सत्ता वाटपाच्या मुद्यावर महायुती विशेषत: भाजप आणि शिवसेनेमध्ये ओढताण दिसून आली. मुख्यमंत्रीपद सोडल्यामुळे भाजपने शिवसेनेला गृह खाते द्यावे अशी मागणी एकनाथ शिंदे यांनी केल्याची चर्चा होती. शिवसेनेकडून नगरविकास, गृह, अर्थ खात्याची मागणी करण्यात आली. त्यामुळे सत्ता वाटपाचा तिढा झाल्याची चर्चा सुरू झाली. तर, दुसरीकडे महायुतीच्या मंत्रिमंडळ फॉर्म्युल्यानुसार, शिवसेना शिंदे गटाकडे फारतर 10 मंत्रिपद येण्याची शक्यता आहे. एकनाथ शिंदे यांनी अधिक मंत्रीपदाची मागणी केली असल्याचेही वृत्त आहे.