IAS Transferred: धडाकेबाज IAS अधिकाऱ्याची नागपूरमधून बदली, CM फडणवीस यांचा निर्णय

देवेंद्र फडणवीस यांनी मुख्यमंत्री म्हणून सूत्रे हातात घेतल्यापासून गेल्या वर्षभरात बदल्यांचा धडाका सुरू आहे. प्रत्येक सप्ताह-दोन सप्ताहात आठ दहा सनदी अधिकाऱ्यांच्या बदल्या होत आहेत. बदल्यांच्या धडाक्याची परंपरा या आठवड्यात देखील अबाधित आहे.

सनदी अधिकारी अभिजीत चौधरी शासनाने आपली बदली केली असून, आपली नियुक्ती महानगर आयुक्त, पुणे महानगर प्रदेश विकास प्राधिकरण, पुणे या पदावर श्री. योगेश म्हसे, भाप्रसे यांच्या जागी ते पद निवड श्रेणीत अवनत करून केली आहे. तरी आपण आपल्या सध्याच्या पदाचा कार्यभार डॉ. विपीन इटणकर, भाप्रसे यांच्याकडे सोपवून, नवीन पदाचा कार्यभार त्वरित स्वीकारावा.

अभिजीत चौधरी नागपूरमध्ये काम करीत असताना त्यांच्यावर अनेकदा टीका झाली. सत्ताधाऱ्ंयाच्या इशाऱ्यावर चालतात, असा आरोप त्यांच्यावर विरोधी पक्षांनी लावला. शांत स्वभावाच्या अभिजीत चौधरी यांनी बोलण्यापेक्षा कृतीतून उत्तरे दिली. पालिकेचा आर्थिक डोलारा डळमळीत असताना राज्यासह केंद्राच्या अनेक योजना त्यांनी यशस्वी राबविल्या. महापालिकांच्या रँकिंगमध्ये नागपूरचा पहिला नंबर यावा यासाठी त्यांनी अनेकदा प्रयत्न केला पण त्यात त्यांना यश आले नाही.

अभिजीत चौधरी यांनी नागपूर महानगरपालिकेच्या आयुक्त आणि प्रशासक पदाची यशस्वी धुरा सांभाळली. ४ जुलै २०२३ ला ते नागपूर महापालिकेचे आयुक्त म्हणून नागपुरात आले होते. डॉ. अभिजीत चौधरी हे मूळचे जळगाव जिल्ह्यातील भुसावळचे रहिवासी आहेत. त्यांचे शिक्षण वैद्यकीय क्षेत्रात झाले असून, २००८ मध्ये त्यांनी एमबीबीएस पदवी संपादन केली. मात्र, प्रशासकीय सेवेच्या ओढीने त्यांनी स्पर्धा परीक्षांकडे आपला मोर्चा वळवला.

डॉ. चौधरी यांची विशेष ओळख म्हणजे त्यांनी भारतीय पोलीस सेवा (IPS) आणि भारतीय प्रशासकीय सेवा (IAS) या दोन्ही प्रतिष्ठित सेवांमध्ये यश मिळवले आहे. २०१० साली भारतीय पोलीस सेवेसाठी (IPS) त्यांची निवड झाली तर २०११ साली भारतीय प्रशासकीय सेवेसाठी (IAS) त्यांची निवड झाली.

गेल्या दशकभरापेक्षा जास्त काळापासून त्यांनी महाराष्ट्रातील विविध जिल्ह्यांमध्ये महत्त्वाच्या पदांवर काम केले आहे. उस्मानाबादचे सहाय्यक जिल्हाधिकारी, नांदेडचे सहाय्यक जिल्हाधिकारी, औरंगाबाद जिल्हा परिषदेचे मुख्य कार्यकारी अधिकारी, भंडारा जिल्हाधिकारी, कोल्हापूर महापालिकेचे आयुक्त, सांगलीचे जिल्हाधिकारी, औरंगाबाद महापालिकेचे आयुक्त अशा विविध पदांवर त्यांनी काम केले.