SSC Exam 2025: दहावीतील विद्यार्थ्यांसाठी गुड न्यूज, नागपूर महापालिका देणार 50 हजारांचं बक्षीस

नागपूर महापालिकेच्या योजनेअंतर्गत प्रत्येक विद्यार्थ्याला दोन टप्प्यांमध्ये आर्थिक सहाय्य मिळणार आहे. मनपा शाळांतील विद्यार्थ्यांचा आत्मविश्वास वाढविणे आणि शिक्षणाकडे अधिक विद्यार्थ्यांना आकर्षित करणे हा या उपक्रमाचा मुख्य उद्देश आहे, असे आयुक्त डॉ. चौधरी यांनी सांगितले.

सध्या मनपाच्या ताब्यात मराठी, हिंदी, उर्दू आणि इंग्रजी अशा चार माध्यमांच्या 28 शाळा आहेत. मार्च 2025 मधील दहावीच्या परीक्षेत या शाळांचा एकूण निकाल 90.28 टक्के इतका लागला आहे. याच विद्यार्थ्यांच्या सन्मान सोहळ्यात आयुक्तांनी दिलेल्या आश्वासनानुसार सामाजिक विकास विभागामार्फत आर्थिक मदतीचा निर्णय प्रत्यक्षात आणला जात आहे. मनपा शाळांमध्ये शैक्षणिक गुणवत्ता वाढविणे, वातावरण आनंददायी बनविणे आणि विद्यार्थ्यांची संख्या वाढविणे या उद्देशाने विविध योजना राबवल्या जात आहेत.