मंदिरात पाडला रक्ताचा सडा, पूजा सुरू असतानाच तरुणाकडून प्रेयसीवर हल्ला, गळ्यावर केले सपासप वार

पोलिसांनी दिलेल्या माहितीनुसार, पीडित २० वर्षीय तरुणी आणि आरोपी रोशन सोनेकर यांच्यात प्रेमसंबंध होते. रोशनचे लग्न झाल्यानंतरही त्यांचे संबंध कायम होते. या संबंधांमुळे रोशनने आपल्या पत्नीला घटस्फोट दिला होता. मात्र, त्यानंतर रोशन दारूच्या व्यसनाच्या आहारी गेला. तो सतत प्रेयसीला त्रास देऊ लागला आणि मारहाणही करत होता. त्यामुळे प्रेयसीने त्याच्यासोबत लग्न करण्यास नकार दिला.

याच कारणावरून चिडलेल्या रोशनने बुधवारी सकाळी प्रेयसी जेव्हा गावातील हनुमान मंदिरात पूजा करत होती, तेव्हा तिच्यावर हल्ला केला. हनुमानाच्या मूर्तीसमोरच रोशनने तिच्या गळ्यावर चाकूने वार केले. या हल्ल्यात तरुणी गंभीर जखमी झाली. तिला तत्काळ उपचारासाठी नागपूर येथील एका खाजगी रुग्णालयात दाखल करण्यात आले आहे, जिथे तिची प्रकृती चिंताजनक असल्याचे समजते.

या घटनेची माहिती मिळताच खापरखेडा पोलिसांनी तातडीने तपास सुरू करत आरोपी रोशन सोनेकरला अटक केली आहे. या घटनेमुळे परिसरात भीतीचे वातावरण निर्माण झाले असून, पोलीस या प्रकरणाचा अधिक तपास करत आहेत. एका प्रियकराने अशाप्रकारे तरुणीवर मंदिरात हल्ला केल्याने परिसरात एकच खळबळ उडाली आहे.