हळद लागली, नवरीसोबत तुफान नाचला पोलीस नवरदेव, रात्रीत घडलं भयंकर, नांदेडमधील धक्कादायक प्रकार

किनवट तालुक्यातील नागेशवाडी येथील रहिवासी योगेश दत्ता घुगे हा चंद्रपूर जिल्हा पोलीस दलात शिपाई म्हणून कार्यरत आहे. त्याचा विवाह तालुक्यातीलच मदनापूर येथील एका तरुणीशी ठरला होता. ती तरुणीदेखील पोलीस दलातच सेवा बजावत आहे. दोन्ही पोलीस कुटुंबांनी वर्षभरापूर्वी हा विवाह निश्चित केला होता. मंगळवारी सकाळी ११.५४ मिनिटांच्या मुहूर्तावर हा विवाह सोहळा पार पडणार होता.

सोमवारी रात्री मदनापूर येथे हळदीचा कार्यक्रम मोठ्या उत्साहात पार पडला. वरात घेऊन नवरदेव वधूच्या घरी पोहोचला होता. यावेळी डीजेच्या तालावर नवरदेव योगेश आणि नवरीने एकत्र मनसोक्त डान्सही केला. रात्री उशिरापर्यंत सर्व काही आनंदाने सुरू होते. मात्र, मंगळवारी पहाटेच्या सुमारास जेव्हा लग्नाची तयारी अंतिम टप्प्यात होती, तेव्हा योगेश अचानक गायब झाल्याचं समोर आलं.

सकाळी नातेवाईकांनी योगेशची शोधाशोध सुरू केली, मात्र तो कुठेच सापडला नाही. त्याचा मोबाईलही बंद येत असल्याने कुटुंबीयांची धाकधूक वाढली. विवाहाच्या काही तासांपूर्वीच नवरदेव बेपत्ता झाल्याची बातमी समजताच वधूला मोठा धक्का बसला. आनंदाच्या वातावरणाचे रूपांतर क्षणात चिंतेत झाले. सर्व नातेवाईकांनी आजूबाजूच्या परिसरात शोध घेऊनही योगेशचा काहीच पत्ता लागला नाही. अखेर हताश होऊन कुटुंबीयांनी किनवट पोलीस ठाणे गाठले आणि तो बेपत्ता असल्याची तक्रार नोंदवली. घटनेचा पुढील तपास केला जात आहे.