निफाडमध्ये उपनगराध्यक्षाच्या शेतात अघोरी कृत्य, हिरव्या बांगड्या आणि धमकीची चिठ्ठी; गावात चर्चांना उधाण

घटनास्थळी आढळलेल्या प्रत्येक बाहुलीला स्वतंत्र चिठ्ठी बांधलेली होती. पहिल्या चिठ्ठीवर अनिल कुंदे, तर उर्वरित दोन चिठ्ठ्यांवर त्यांचे नातेवाईक उत्तम कुंदे आणि सुनील कुंदे अशी नावे लिहिलेली होती. तिन्ही चिठ्ठ्यांमध्ये आम्ही तुम्हाला ठार मारण्याची सुपारी घेतली आहे, असा धक्कादायक मजकूर असल्याने या प्रकाराला अधिक गंभीर स्वरूप प्राप्त झाले आहे. हा प्रकार काळी जादू किंवा अघोरी कृत्याशी संबंधित असण्याची शक्यता व्यक्त केली जात आहे.

या घटनेची माहिती मिळताच पोलिसांनी तात्काळ घटनास्थळी धाव घेतली. पोलिसांनी सर्व संशयास्पद वस्तू ताब्यात घेऊन पंचनामा केला असून अज्ञात व्यक्तीविरुद्ध गुन्हा दाखल करण्यात आला आहे. या प्रकरणाचा तपास सुरू असून नेमका हा प्रकार कोणी आणि कोणत्या हेतूने केला, याचा शोध घेण्यासाठी पोलिसांकडून विविध अंगांनी तपास केला जात आहे.

दरम्यान, या घटनेवर प्रतिक्रिया देताना उपनगराध्यक्ष अनिल कुंदे यांनी सांगितले की, मी राजकीय आणि सामाजिक कार्यात सक्रिय असून माझ्या राजकीय अस्तित्वाला पायबंद घालण्यासाठीच हा किळसवाणा प्रकार करण्यात आला असावा. अशा घाणेरड्या प्रवृत्तीमुळे मी घाबरणार नाही. तसेच, कायद्यावर आणि पोलिस यंत्रणेवर आपला विश्वास असल्याचेही त्यांनी स्पष्ट केले.

या पार्श्वभूमीवर अंधश्रद्धा निर्मूलन समितीचे कार्यकर्ते डॉ. टी. आर. गोराणे यांनी प्रतिक्रिया देताना सांगितले की, महाराष्ट्रात अंधश्रद्धा निर्मूलन कायदा लागू होऊन 13 वर्षे झाली असली तरी त्याची कडक अंमलबजावणी होताना दिसत नाही. या कायद्याची प्रभावी अंमलबजावणी झाली तर अशा प्रकारच्या गुन्हेगारी आणि अंधश्रद्धेवर आधारित घटनांना मोठ्या प्रमाणात आळा बसेल. तसेच नागरिकांनी अशा अंधश्रद्धात्मक प्रकारांवर विश्वास ठेवू नये, असे आवाहनही त्यांनी केले आहे.

या घटनेमुळे निफाड तालुक्यात भीतीचे वातावरण निर्माण झाले असून, आरोपींचा लवकरात लवकर शोध घेऊन कठोर कारवाई करावी, अशी मागणी नागरिकांकडून केली जात आहे.