Gold Silver Today Rate: चांदी १७ हजारांनी स्वस्त, सोन्याचा दर काय? जळगावच्या सराफा बाजारातून गुढी पाडव्याआधी गुड न्यूज!

आखाती देशांमधील युद्धजन्य परिस्थिती आणि जागतिक बाजारातील अनिश्चितता असूनही, गुंतवणूकदारांकडून मोठ्या प्रमाणावर झालेल्या 'नफा वसुली'मुळे दरात ही कपात पाहायला मिळत असल्याचे सांगण्यात येत आहे. गेल्या पाच दिवसांच्या आकडेवारीवर नजर टाकल्यास, सोन्याच्या दरात तब्बल ४ हजार रुपयांची, तर चांदीच्या दरात १७ हजार ५०० रुपयांची मोठी घसरण झाली आहे. केवळ २४ तासांत सोन्याचे दर १ हजार ५०० रुपयांनी, तर चांदी ४ हजार रुपयांनी स्वस्त झाली आहे.

जळगाव सराफ बाजारातील ताज्या माहितीनुसार, सध्या जीएसटीसह सोन्याचा दर १ लाख ६४ हजार रुपये प्रति तोळा आहे. चांदीचा दर २ लाख ६८ हजार रुपये प्रति किलोवर पोहोचला आहे. सततच्या दरवाढीमुळे धास्तावलेल्या ग्राहकांसाठी ही घसरण म्हणजे गुढीपाडव्याची आगाऊ भेटच मानली जात आहे.

गुढीपाडव्याच्या मुहूर्तावर सोने खरेदी करणे अत्यंत शुभ मानले जाते. आता दरात मोठी कपात झाल्यामुळे बाजारात ग्राहकांची गर्दी वाढण्याची शक्यता सराफ व्यावसायिकांनी व्यक्त केली आहे. "दरात झालेली ही घसरण व्यापारी म्हणून चिंतेची असली, तरी गुढीपाडव्याच्या मुहूर्तावर यामुळे मोठ्या प्रमाणावर उलाढाल होईल," असा विश्वास स्थानिक व्यापाऱ्यांनी व्यक्त केला आहे.