IT मध्ये नोकरी, आई-वडिलांना भेटायला निघाला, काळाने डाव साधला, मोहदरी घाटात तिघांसोबत भयंकर...

बुधवारी सकाळी 10:15 च्या सुमारास मोहदरी घाटात हा थरार घडला. सिन्नरकडून नाशिककडे जाणारा कंटेनर (MH 46 AR 2725) चालकाचे नियंत्रण सुटल्याने दुभाजक तोडून थेट विरुद्ध लेनवर (नाशिक ते सिन्नर मार्ग) जाऊन उलटला. त्याच वेळी नाशिककडून सिन्नरकडे जाणारी महिंद्रा पिकअप (MH 15 GV 7149) आणि एक दुचाकी (MH 15 CB 6796) या कंटेनरच्या भीषण तडाख्यात सापडल्या. हा अपघात इतका भीषण होता की कंटेनर आणि पिकअप दोन्ही वाहने उलटली, तर दुचाकीस्वार कंटेनरखाली चिरडले गेले.

या अपघातातील सर्वात चटका लावणारी गोष्ट म्हणजे 23 वर्षीय अवधूत निर्मळ याचा मृत्यू. अवधूतची नुकतीच मुंबईतील एका नामांकित कंपनीत 'आयटी इंजिनिअर' म्हणून निवड झाली होती. तो आपल्या आई-वडिलांचा एकुलता एक मुलगा होता. सुट्टीसाठी नाशिकला आला असताना आपल्या नातेवाईकांच्या (बाळासाहेब व्यापारी) पिकअपमधून तो गावी जात होता. मात्र, घरापर्यंत पोहोचण्याआधीच काळाने त्याच्यावर झडप घातली.

अपघातानंतर माणुसकी विसरून कंटेनर चालक मदतीऐवजी घटनास्थळावरून पसार झाला. पोलिसांनी त्याच्याविरुद्ध गुन्हा दाखल केला असून शोध सुरू आहे.

मोहदरी घाटात जड वाहनांचा वाढलेला वेग, चुकीच्या दिशेने होणारी वाहतूक आणि तांत्रिक त्रुटी यामुळे अपघातांचे सत्र थांबण्याचे नाव घेत नाहीये. या ठिकाणी प्रशासनाने तातडीने कायमस्वरूपी उपाययोजना कराव्यात, अशी मागणी संतप्त नागरिकांनी केली आहे.