दिवाळी फराळाची नाशिकमध्ये मोठी मागणी, मालपाठकर बंधूंचे स्टॉल हिट

कुणाल दंडगव्हाळ - प्रतिनीधी, नाशिक : दिवाळी आता अवघ्या काही दिवसांवर आली आहे, सर्वत्र लोकांची दिवाळीच्या खरेदीसाठी लगबग सुरु आहे. नशिकमध्ये ही अशीच परिस्थीती आहे, सर्वत्र दिवाळीच्या फराळाची गडबड सुरू झाली आहे. घरोघरी लाडू, चकली, चिवडा, शंकरपाळे, करंजी अशा गोड पदार्थांची लगबग दिसून येत आहे. घराघरात तयार होणारा हा पारंपरिक फराळ सगळ्यांनाच हवाहवासा वाटतो. पण सध्या, बदलत्या जीवनशैलीमुळे काही लोक याप्रकारे फराळ घरी न बनवता बाजारातून तयार घेण्यास प्राधान्य देत आहेत.

अशातच, नाशिकमध्ये गेली १९ वर्षं पारंपरिक फराळ तयार करून देणारे मालपाठकर बंधू त्यांच्या खास फराळ स्टोलसह पुन्हा तयार आहेत. पंचवटीतील अशोक स्तंभाजवळील यांचे “मालपाठकर फराळ सेंटर” दिवाळीत खास लोकप्रिय आहे. विशेष म्हणजे, त्यांच्या दुकानात मिळणाऱ्या पारंपरिक भाजणीच्या कुरकुरीत चकलीची प्रचंड मागणी असते. ही चकली ते पारंपरिक पद्धतीने आपल्या ग्राहकांसमोर बनवतात, ज्यामुळे ताजेपणा आणि गुणवत्तेची हमी मिळते.