राष्ट्रवादी एकत्र, हर्षवर्धन पाटलांची लेक घड्याळावर लढणार, भरणेंचा लेकही घड्याळावर रिंगणात, मामा-भाऊंचं मनोमीलन!

इंदापूर, पुणे : सर्वशक्तिमान भाजपसमोर 'बटेंगे तो कटेंगे' हे लक्षात आल्यानंतर 'एक है तो सेफ है' चा अंतर्गत नारा देऊन दोन्ही राष्ट्रवादीचे मनोमिलन झाले आहे. मनोमीलनाचा पहिला प्रयोग महापालिका निवडणुकीवेळी पुणे आणि पिंपरी चिंचवडमध्ये झाला. परंतु निवडणुकीच्या अगदी तोंडावर दोन्ही राष्ट्रवादी एकत्र आल्याने मतदारांमध्ये संभ्रम होऊन मतांच्या टक्केवारीत चांगलीच घट झाली. पुणे आणि पिंपरी चिंचवड खरे तर राष्ट्रवादीचा बालेकिल्ला. परंतु यंदा राष्ट्रवादीची जोरदार पिछेहाट झाली. त्यामुळे जिल्हा परिषद निवडणुकीत महापालिकेची पुनरावृत्ती होऊ नये म्हणून दोन्ही पक्षाच्या नेत्यांनी एकत्रित निवडणुकांना सामोरे जाण्याचे ठरवले आहे. इंदापुरात काय होणार, कट्टर प्रतिस्पर्धी दत्ता मामा भरणे आणि हर्षवर्धन पाटील सोबत येणार का? याकडे अनेकांचे लक्ष लागले होते. मात्र दोन्ही नेत्यांनी एकत्रित येऊन एकमेकांच्या मुलांचा प्रचार करणार असल्याचे जाहीर केले आहे. त्यामुळे इंदापुरात प्रवीण माने यांच्यासमोर हर्षवर्धन पाटील आणि दत्तामामा भरणे यांचे तगडे आव्हान असेल.