अशोक खरातकडून हिंदू स्त्रियांवर अत्याचार, तरी तुम्ही गप्प का? नितेश राणेंनी अखेर मौन सोडलं

नाशिकमधील भोंदू बाबा अशोक खरात प्रकरणावर नितेश राणे यांनी आपली भूमिका स्पष्ट केली आहे. या प्रकरणातील पीडित महिलांनी थेट सरकारशी संपर्क साधावा, त्यांना सर्वतोपरी मदत केली जाईल, असे आवाहन नितेश राणे यांनी केले आहे. ते पिंपरी चिंचवड येथे प्रसारमाध्यमांशी बोलत होते.

अशोक खरात याच्या संदर्भाने पत्रकारांनी अडचणीत आणणारे प्रश्न विचारताच, प्रत्येक धर्मात अशोक खरातसारखे काही 'सडके आंबे'निघतातच, असे म्हणून त्यांनी वेळ मारून नेण्याचा प्रयत्न केला. सरकार महिलांच्या बाजूने ठामपणे उभे आहे, असे ते म्हणाले तसेच, या भोंदू बाबाचे सर्वपक्षीय नेत्यांशी संबंध असल्याच्या प्रश्नावर त्यांनी पत्रकारांनाच प्रतिप्रश्न करत अधिक बोलणे टाळले.

विरोधकांवर टीका करताना त्यांनी म्हटले की, हिंदू धर्माची बदनामी होत असताना काही जणांना त्यातच आनंद मिळतो. याशिवाय छत्रपती शिवाजी महाराज यांच्याबद्दल अपमानास्पद वक्तव्य करणाऱ्यांना कठोर शिक्षा झाली पाहिजे, अशी मागणीही त्यांनी केली.

भोंदूबाबा अशोक खरात याला बुधवारी रात्री नाशिक पोलिसांनी अटक केली. खरातच्या पेन ड्राइव्हमध्ये ५८ आक्षेपार्ह व्हिडिओ सापडल्याने राज्यात एकच खळबळ उडाली आहे. त्याने किती महिलांवर अत्याचार केले आहेत, असा प्रश्न यानिमित्ताने उपस्थित होत आहे. या प्रकरणाची दखल खुद्द मुख्यमंत्री फडणवीस यांनी घेऊन पोलीस महासंचालकांना कारवाईचे आदेश दिले आहेत. त्यांच्या निर्देशानुसारच खरात याच्या चौकशी करिता तेजस्वी सातपुते यांच्या नेतृत्वात एसआयटीची स्थापना केल्याचे सांगितले जाते.

एसआयटीच्या प्रमुख तेजस्विनी सातपुते यांनी महिलांच्या लैंगिक शोषणाप्रकरणी अशोक खरात याची काल तब्बल सात तास चौकशी केली तर आजही दुपारपासून त्याची चौकशी सुरू आहे. त्याच्याकडे असलेल्या पॅनड्राईव्हबाबतही त्यांनी विचारपूस केल्याचे कळते.