Parner Vidhan Sabha: पारनेरमध्ये शरद पवारांचा डाव; जाएंट किलर निलेश लंकेंची पत्नी विधानसभेच्या रिंगणात

पारनेर :  महाराष्ट्राच्या काही विधानसभेच्या जागा लोकसभेच्या निवडणुकांपासून राज्यभर गाजल्या. त्यातली एक म्हणजे अहमदनगर जिल्ह्यातील पारनेरची जागा. लोकसभेत भाजपच्या सुजय विखे पाटील यांना हरवणाऱ्या निलेश लंके यांचा हा मतदारसंघ. नगर लोकसभा मतदारसंघाची निवडणूक निलेश लंके यांनी गाजवली होती. राष्ट्रवादी शरदचंद्र पवार पक्षाचे ते पारनेरचे आमदार होते आणि त्यांनाच शरद पवारांनी लोकसभेच्या रिंगणात उतरवलं. पहिल्यांदाच लोकसभेच्या रिंगणाच उतरलेल्या लंके यांनी माजी खासदार सुजय विखे पाटील यांचा पराभव केला. त्या पारनेरची जागा लंके खासदार झाल्याने सध्या रिक्त आहे. महाविकास आघाडीने निलेश लंकेना बक्षीस म्हणून पारनेरमधून त्यांच्या पत्नीला तिकिट दिलं आहे.  महायुतीत ही जागा कुणाकडे जाणार यावरून शिवसेना आणि राष्ट्रवादी यांच्यात रस्सीखेच सुरू होती आणि अखेर ती जागा अजित पवारांना म्हणजे राष्ट्रवादीला सुटली. पारनेरमध्ये आता राष्ट्रवादी विरुद्ध राष्ट्रवादी असा संघर्ष असेल. शरदचंद्र पवार गटाच्या राणी लंके विरुद्ध अजित पवार गटाचे काशिनाथ दाते असा सामना पारनेर विधानसभेसाठी होणार आहे.