डॉक्टर मृत्यू प्रकरणानंतर अजून ३ गंभीर आरोप, ते लोक मीडियासमोर, रणजितसिंह नाईक निंबाळकर संकटात

मुंबई : शेतकरी बापाच्या पोरीने मोठ्या संकटांना तोंड देऊन वैद्यकीय शिक्षण पूर्ण केले, फलटणमध्ये नोकरीला सुरुवात केली परंतु राजकारणी लोकांपुढे आणि त्यांच्या दबावापुढे तिला झुकावे लागले. शवविच्छेदन अहवाल बदलण्यासाठी राजकारण्यांकडून वारंवार येणारा दबाव तसेच तंदुरुस्ती प्रमाणपत्र देण्यासाठी रात्री अपरात्री येणारे फोन, वैयक्तिक आयुष्यातील ढवळाढवळ आदी कारणांमुळे तरुणीने आयुष्याला पूर्णविराम देण्याचा निर्णय घेतला. माजी खासदार रणजितसिंह नाईक निंबाळकर यांच्या मार्फत त्यांच्या स्वीय सहाय्यकाकडून माझ्यावर अनेकदा दबाव आला, वारंवार फोन यायचे, असे एका पत्रात तरुणीने लिहिल्यामुळे मृत्यू प्रकरणाच्या तपासाला नवे वळण मिळाले आहे. विरोधकांनी देखील निंबाळकरांना खिंडीत गाठून त्यांच्या चौकशीची मागणी केली आहे. परंतु डॉक्टर आत्महत्या प्रकरणानंतर निंबाळकर यांच्यावर तीन नवे आरोप झाल्याने त्यांच्या कथित छळकथा समोर येऊ लागल्या आहेत. निंबाळकर यांनी पोलीस यंत्रणा आणि आरोग्य यंत्रणेला हाताशी धरून त्रास दिल्याचे अनेक जण माध्यमांना सांगत आहेत. अधोरेखित करण्यासारखी बाब म्हणजे मुख्यमंत्री देवेंद्र फडणवीस यांनी फलटणमध्ये जाऊन निंबाळकर यांना क्लिनचिट दिली आहे. फलटण डॉक्टर आत्महत्या प्रकरणात निंबाळकर यांचा कोणताही संबंध नसल्याचे फडणवीस म्हणाले.