डॉक्टर महिलेला छळणारा PSI बदने कुठे पळाला? अखेर लोकेशन सापडलं, पोलीस पथकं रवाना

पीएसआय बदाने याने माझ्यावर चार वेळा अत्याचार केला. तर प्रशांत बनकरने आपल्याला मानसिक आणि शारीरिक त्रास दिल्याचं तिने हातावर लिहिलेल्या नोटमध्ये म्हटलं आहे. हा सगळा प्रकार समोर आल्यानंतर आरोपी गोपाल बदाने आणि प्रशांत बनकर दोघंही फरार झाले. आज पहाटे पोलिसांनी प्रशांत बनकरला अटक केली आहे. पुण्यातील एका फार्महाऊसमधून त्याला बेड्या ठोकल्या आहेत. प्रशांतला अटक केली असली तरी या प्रकरणातील मुख्य आरोपी पीएसआय गोपाल बदने अद्याप फरार आहे.

मात्र पोलिसांना आता त्याचं लोकेशन सापडलं आहे. निलंबित पीएसआय गोपाल बदनेचं शेवटचं लोकेशन पंढरपुरात आढळलं आहे. डॉक्टर महिलेच्या आत्महत्येची बातमी समोर येताच बदने फरार झाला होता. तो कुठे गेला? याचा काहीच थांगपत्ता लागत नव्हता. सातारा पोलिसांची चार ते पाच पथकं त्याचा शोध घेत होती. मात्र अखेर काल रात्री गोपाल बदनेचं लोकेशन पंढरपुरात आढळलं आहे.

तो पंढरपुरात कुठेतरी लपून बसला असावा, असा पोलिसांना संशय आहे. त्याला पकडण्यासाठी पोलीस पथकं रवाना झाली आहेत. पोलिसांकडून शोधकार्य सुरू आहे. आरोपी बदने याने आपल्यावर चारवेळा लैंगिक अत्याचार केला, असा आरोप मयत डॉक्टरने सुसाईड नोटमध्ये केला आहे. पोलीस प्रशासनातील एका व्यक्तीने अशाप्रकारे महिलेचा छळ केल्याने गृहविभागावर प्रश्नचिन्ह निर्माण झालं आहे.

मिळालेल्या माहितीनुसार, फलटणमधील महिला डॉक्टरने आत्महत्या केल्याची माहिती समोर आल्यापासून प्रशांत बनकर फरार झाला होता. तो थेट पुण्यात आला. इथं तो एका मित्राच्या फार्महाऊसवर लपून बसला होता. मागील काही तासांपासून तो इथेच मुक्कामी होता. मात्र पोलिसांना याबाबत गुप्त माहिती मिळाल्यानंतर पोलिसांनी पहाटे चार वाजता संबंधित फार्महाऊसवर छापेमारी केली. यावेळी तिथे प्रशांत बनकर पोलिसांना आढळला. ग्रामीण पोलिसांनी तातडीने त्याला अटक केली. याच्या अटकेनंतर या प्रकरणातील आणखी काही धागेदोरे समोर येतायत का? हे पाहणं महत्त्वाचं असेल.