ZP Election Result 2026 Indapur Taluka: इंदापूरमध्ये 9 वर्षांचा वनवास संपला; 'बड्या' नेत्यांच्या पोरांच्या नशिबाचा होणार फैसला
- Published by:Prachi Amale
Last Updated:
विधानसभा निवडणुकीनंतर इंदापुरात पुन्हा एकदा दत्तात्रय भरणे आणि हर्षवर्धन पाटील हे दोन दिग्गज आमनेसामने आहेत.
पुणे: इंदापूर तालुक्याच्या ग्रामीण राजकारणाचा पारा आता शिगेला पोहोचला आहे. तब्बल 9 वर्षांच्या प्रदीर्घ प्रतीक्षेनंतर जिल्हा परिषद (ZP) आणि पंचायत समिती (PS) निवडणुकीसाठी 7 फेब्रुवारी रोजी विक्रमी मतदान पार पडले. सकाळी 10 वाजल्यापासून मतमोजणीला सुरुवात होणार असून, तालुक्यावर कोणाचं वर्चस्व राहणार, याचा फैसला काही तासांत होणार आहे.
विधानसभा निवडणुकीनंतर इंदापुरात पुन्हा एकदा दत्तात्रय भरणे आणि हर्षवर्धन पाटील हे दोन दिग्गज आमनेसामने आहेत. मात्र, यावेळी परिस्थिती वेगळी आहे. जरी काही ठिकाणी 'मनोमिलन' झाल्याची चर्चा असली, तरी स्थानिक पातळीवर कार्यकर्त्यांमधील संघर्ष कायम आहे. त्यातच अजित पवार यांच्या दुःखद निधनानंतर (जानेवारी २०२६) तालुक्यातील राजकीय पोकळी भरून काढण्याची मोठी जबाबदारी भरणे यांच्या खांद्यावर आहे.
advertisement
दुसरी पिढी मैदानात: श्रीराज भरणेंचं 'डेब्यू'
या निवडणुकीचे सर्वात मोठे आकर्षण म्हणजे कृषिमंत्री दत्तात्रय भरणे यांचे चिरंजीव श्रीराज भरणे. बोरी गणातून त्यांनी पंचायत समितीची निवडणूक लढवली आहे. तर दुसरीकडे, हर्षवर्धन पाटील यांच्या कन्या अंकिता पाटील यांनीही 'घड्याळ' चिन्हावर आपले नशीब आजमावले आहे. त्यामुळे ही निवडणूक खऱ्या अर्थाने 'वारसांच्या अस्तित्वाची' लढाई ठरली आहे.
advertisement
आरक्षणाचा पेच: अनेकांची 'फिल्डिंग' विस्कळीत
नव्या आरक्षण रचनेमुळे 8 जिल्हा परिषद गटांपैकी अनेक जागा महिला आणि अनुसूचित जातीसाठी राखीव झाल्या. यामुळे अनेक अनुभवी नेत्यांना स्वतः बाजूला होऊन पत्नी किंवा कुटुंबातील सदस्यांना उमेदवारी द्यावी लागली.
आरक्षणाचे मुख्य केंद्र:
- काटी-लाखेवाडी: तालुक्यातील एकमेव 'खुला' गट, जिथे सर्वाधिक चुरस आहे.
- बोरी-वालचंदनगर: अनुसूचित जाती महिला राखीव; इथेच खरी शक्ती पणाला लागली आहे.
- भिगवण-शेटफळगडे: पुणे जिल्ह्याचे प्रवेशद्वार असलेल्या या गटात राष्ट्रवादी आणि भाजपमध्ये थेट टक्कर आहे.
advertisement
आजच्या निकालाकडे संपूर्ण राज्याचे लक्ष
आज होणाऱ्या मतमोजणीसाठी इंदापूर प्रशासन सज्ज झाले आहे. सकाळी ११ वाजेपर्यंत कल स्पष्ट व्हायला सुरुवात होईल. ही निवडणूक केवळ स्थानिक स्वराज्य संस्थेची नसून, 2029 च्या विधानसभेची रंगीत तालीम मानली जात आहे.
Location :
Pune Cantonment (Pune Camp),Pune,Maharashtra
First Published :
Feb 09, 2026 5:01 AM IST
मराठी बातम्या/महाराष्ट्र/
ZP Election Result 2026 Indapur Taluka: इंदापूरमध्ये 9 वर्षांचा वनवास संपला; 'बड्या' नेत्यांच्या पोरांच्या नशिबाचा होणार फैसला
